Rûspiyên eşîrên Kurdan ên Bakur û Rojhilatê Sûrî diyar kir ku siyasetên hikumeta Şamê xizmeta çareseriya aloziya Sûriyê nakin. Rûspiyan anî ziman ku siyasetên derxistina fitneyê bi kêr nayên û çareserî diyalog e.
Hikûmeta Şamê bi rêya çeteyên xwe yên Dîfaa El-Wetenî re, hewl dide fitneyê di navbera pêkhateyên Sûriyê de bifirîne.
Hewldana wan a dawî jî li taxa Tey a bajarê Qamişlo bû, lê ev yek bi ser neket ji ber ku şêniyên herêmên Bakur û Rojhilatê Sûrî li rex rêveberiya xwe disekinin.
Li hemberî vê hewldanê şêx û rûspiyên herêmê hevgirtina xwe bi Rêveberiya Xweser re diyar kir.
Mezinê eşîra Teyî ya Kurd Hewas Cidêi teqez kir ku êrîşa çeteyên Dîfaa El-Wetenî, dewam siyasetên hikumeta Şamê yên derbkirina jiyana hevbeş û aramiya herêmê ye, da ku sûdê ji rewşa tevlîheviyê bigire û ji nû ve serweriya xwe ferz bike.
Hewas Cidêi got:
“Bûyerên taxa Teyî ji valahiyê nehatin. Ew bûyer berdewama plana rejîma Sûrî ne.
Dîfaa El-Wetenî tenê amûrek e ji bo pêkanîna vê siyasetê.
Li pişt êrîşên çeteyên Dîfaa El-Wetenî yên li ser bendên kontrolê yên Asayîşê gelek armancên wan hebûn.
Ya sereke derbkirina aramî, hêminî û derxistina fitneya Kurdî-Erebî ji bo lawazkirina Rêveberiya Xweser. Lê belê ew bi bin ketin.”
Li ser encamên wê siyasetê û helwesta eşîran, Cidêi destnîşan kir ku ji ber yekîtiya nîştimanî ya pekhate û eşîrên herêmê ew siyaset bi bin ket.
Rûspiyê eîşra Benî Sebaa Hayis El-Ciryan ji bo aştî û bidawîkirina fiteneyê hewldan kir.
Lê me dît çawa bi awayekî hovane, ji aliyê çeteyên Dîfaa El-Wetenî ve hat şehîdxistin. Armanc jê derxistina fitneyê di navbera pêkhateyan de bû.
Mezinê eşîra Teyî ya Kurd diyar kir ku hikumeta Şamê û çeteyên wê yên bi navê Dîfaa El-Wetenî çi qasî hewl bidin û çi rêbazan bi kar bînin jî dê nikaribin vîna pêkhateyên herêmê bişikînin, ji ber şêniyên herêmê bi felsefeya jiyana hevbeş û biratiya gelan bawer in.
Rûspiyên eşîrên Kurdan: Ji bo çareseriyê divê diyalog bingeh bê girtin
Rûspiyê eşîra Harûn a Kurdan a li herêma Cizîrê Osman Îbrahîm jî da zanîn ku kirinên hikûmeta Şamê yên bi rêya çeteyên xwe, xizmeta gelên Sûriyê û çareserkirina aloziya Sûriyê nakin, berovajî wê aloziyê kûrtir û dirêjtir dikin.
Îbrahîm destnîşan kir ku divê rastiya wan siyasetan bê nasîn û li ser wî esasê bê tevgerkirin û ji bo gihaştina çareseriyê divê diyalog bingeh bê girtin.