Li başûrê Kurdistanê roj bi roj nerazîbûn û çalakiyên li dijî êrîşên dagirkeriyê zêde dibin.
Ji Fermandarên Pêşmergeyan a YNK’ê Wehab Sertîp diyar kir ku şerê navxweyî xiyanete û bang li hemû aliyên siyasî yên Kurd kir ku li dijî êrîşên Tirkiyê eniyeke hevbeş ava bikin.
Berdevkê Fermandariya Giştî ya Artêşa Iraqê Yehya Resul jî destnîşan kir ku li hemberî êrîş û binpêkirinên dewleta Tirk, liv û tevgerek dîplomatîk a Iraqê heye û berdewam dike.
Rêxistinên Kurdan ên li Rûsyayê jî berxwedana gerîlayan silav kirin û hevkariya PDK’ê bi dijmin re şermezar kirin.
Nerazîbûn û çalakiyên li dijî êrîşên dewleta Tirk a dagirker yên li ser başûrê Kurdistanê û hevkariya PDK’ê ya bi dagirkeran re zêde dibe.
Ji Fermandariya Pêşmergeyan a YNK’ê Wehab Sertîp ji ANF’ê re axivî û destnîşan kir ku dijmin hewl dide Kurdan bêhêz bike.
Wehab Sertîp diyar kir ku Tirkiye bi behaneya PKK’ê dixwaze destkeftiyên Kurdan tune bike.
Fermandarê Pêşmergeyan Wehab Sertîp bang li hemû aliyên siyasî yên Kurdî kir ku li dijî êrîşên Tirkiyê eniyeke hevbeş ava bikin.
Artêşa Iraqê: Li hemberî êrîşên Tirkiyê liv û tevgerek dîplomatîk a Iraqê heye
Derbarê domandina êrîşên Tirkiyê ser xaka Başûrê Kurdistanê, Berdevkê Fermandariya Giştî ya Artêşa Iraqê Yehya Resul ji Ajansa Nûçeyan a Iraqê re axivî.
Yehya Resul destnîşan kir ku Iraq li hemberî hemû cîranên xwe rêzdariyê nîşan dide, lewma divê hemû dewlet jî rêzdariyê nîşanî serweriya axa Iraqê bidin.
Resûl ji Tirkiyê xwest vê yekê li ber çavan bigire û rêzdariyê nîşan bide.
Yehya Resul destnîşan kir ku li hemberî êrîş û binpêkirinên dewleta Tirk liv û tevgerek dîplomatîk a Wezareta Karên Derve ya Iraqê heye û berdewam dikin.
Hunermend Hîkmet Hîndî: Em ê li dijî her hewldanek ji bo şerê birakujî derkevin
Li aliyê din jî, bi dehan hunermend wê roja pênçşemê 17’ê hezîranê li Silêmaniyê di saet 17.00’an de li dijî dagirkeriya dewleta Tirk û hewldanên pêxistina agirê şer ya di nava Kurdan de, meşekê li dar bixin.
Hunermend Hîkmet Hîndî ku yek ji organîzetorê çalakiyê ye ji Rojnews’ê re axivî û got ku ew ê rê nedin xak û darên me werin firot in û ew ê li dijî her hewldanek ji bo şerê birakujî derkevin.
Parlamentoya Başûrê Kurdistanê rûniştina bi dayîkên aştiyê re red kir
Dayîkên Aştiyê yên Başûrê Kurdistanê, di 12’yê Hezîranê de serî li Serokatiya Parlamentoya Başûrê Kurdistanê da û daxwaza hevdîtinê kir.
Serokatiya Parlamentoyê jî 14’yê Hezîranê bi riya sekretera Seroka Parlamentoyê, bi devkî bersiv da dayîkan.
Di bersiva ecêb û balkêş de hat gotin: “Em tu komên bi navê aştiyê qebûl nakin, hevdîtinê pêk nayînin.”
Dayîkên Aştiyê her wiha xwestin ku bi firaksiyonên hinek partiyên li parlamentoyê re jî hevdîtin bikin, lê ew firaksiyon jî erênî nêzîk nebûne û daxwaza hevdîtinê red kiriye.
Kurdên li Rûsyayê berxwedana gerîlayan silav kir
Rêxistinên Kurdan ên li Rûsyayê û Civata Dewletên Yekbûyî li paytexta Rûsya Moskowayê li hev civiyan û berxwedana gerîlayan silav kir û hevkariya bi dijmin re şermezar kir.
