Nerazîbûnên li dijî êrîşên li ser HDP’ê û qetilkirina Deniz Poyraz zêde dibin.
Koma Tifaqa Kurdistanî li dijî êrîşên ser HDP’ê bang li hemû hêzên demokrasiyê û saziyên civakî yên sivîl kir ku piştgirî û hevkariyê bi HDP’ê re bikin.
Ji bo şermezarkirina êrîşa li ser avahiya HDP’ê û qetilkirina Denîz Poyraz, li Îzmîr, Amed û Êlihê jinan çalakiyên cur be cur lidarxistin û dan zanîn ku ew ê ji bo hesabxwestina ji kujerên wê herdem di nava têkoşînê de bin.
Li dijî êrîşa li ser avahiya HDP’ê ya li Îzmîrê û qetilkirina Denîz Poyraz çalakiyên nerazîbûnê li Tirkiye û Bakurê Kurdistanê dewam dikin.
Koma Tifaqa Kurdistanî têkildarî êrîşa dijî avahiya HDP’ê ya Îzmîrê û kuştina endama HDP’ê Denîz Poyraz daxuyaniyek nivîskî weşand.
Di daxuyaniya de hat destnîşankirin ku êrişên dijî HDP’ê sedema xwe ji axaftina serokomar Tayîp Erdogan û Serokê MHP’ê Dewlet Bahçelî digire.
Tifaqa Kurdistanî got ku bersiva wan li hember êrîşan ev e, “Em ê tu caran li hemberî we çok daynenin û navber nedin meşa xwe ya azadiyê.”
Koma Tifaqa Kurdistanî diyar kir ku berpirsê kuştina Deniz Poyraz desthilata AKP-MHP ye û bang li hemû hêzên demokrasiyê û saziyên civakî yên sivîl kir ku piştgirî û hevkariyê bi HDP’ê re bikin.
Li Êlihê polîsan êrîşî daxuyaniya dayîkên aştiyê kir û gelek kes binçav kir
Li Êlihê jî Dayikên Aştiyê ji bo şermezarkirina kuştina Denîz Poyraz xwestin daxuyaniyekê bidin çapemeniyê, lê polîsan dayikan dorpêç kir û êrişî çalakiyê kir.
Di encamê de polîsan gelek kes bi erdê re kaş kirin û binçav kirin.
TJA û meclisa Jinan a HDP’ê li gundê Deniz meşek li dar xistin
Tevgera Jinên Azad (TJA), Meclisa Jinan a HDP’ê û Dayikên Aştiyê li gundê ku Denîz Poyraz lê ji dayik bûye meşek li dar xist û daxuyaniyek da.
Di daxuyaniyê de hate gotin, Denîz, Denîza me hemuya ye û Em ê li ser şopa wan bin.
Hat diyar kirin ku wan sekna dayikan di kesayeta dayika Denîz de dît û ew ê bi têkoşîna xwe hesab jî ji kujeran bipirsin.
Meclisa Jinan a Dad’ê: Dem dema têkoşîna bi hev re ye
Her wiha Meclisa Jinan a Komeleyên Elewî yên Demokratîk DAD’ê bi daxuyaniyeke nivîskî kuştina Denîz Poyraz şermezar kir û got:
“Li dijî lîstîkên dîktatoriyê, dema dema têkoşîna bi hev re ye.
Em wek meclisa jinan têkoşîna heqîqetê dewr bigirin û nahelin ku Denîzeke din bê kuştin.”
Jinan li ser sûrên Amedê wêneyên Deniz Poyraz daliqandin
Jinên HDP’î, TJA û Komeleya Rosa jî li ser sûrên Amedê wêneyê Denîz Poyraz daliqandin.
Parlementerên HDP’ê Remziye Tosûn, Dîlan Dîrayet Taşdemîr û Sevîn Coşkûn li gel aktivîstên TJA’yê û endamên Komeleya Jinan a Rosa tevlî çalakiyê bûn.
Jinan dema ku wêneyê Denîz daliqandin sembola serketinê nîşan da.
Jinên ku xwedî li Peymana Stenbolê derketin, li Maltepe hatin cem hev
Jinên ku ji bajarên Kurdistanê û Tirkiyê hatin cem hev ji bo ku xwedî li Peymana Stenbolê derkevin li Maltepe Stenbolê jî hatin cem hev.
Jinan wêneyên Deniz Poyraz hildan û gotin:
”Jin jiyan azadî û wê têkoşîna jinan ya li beramberî tundî û kuştinê bi serbikeve”.
