Hevserokê KNK’ê Ehmed Karamûs da zanîn ku PDK bi hevkariya bi dewleta Tirk re ziyanê dide yekîtiya neteweyî ya Kurd û got: “PDK li hember yekîtiya Kurd asteng e.” Karamûs derbarê gefên li ser Şengalê jî anî ziman “Ji bo ku Şengal xwe ji êrişan biparêze pêdivîya wê bi statuya xweser heye.”
Hevserokê Kongreya Neteweyî ya Kurdistanê (KNK) Ehmed Karamûs, li ser êrişên dewleta Tirk yên li dijî başûrê Kuridstanê, hevkariya PDK’ê ya bi Tirkiyê re û gefên wan ên li ser Şengalê ji Ajansa Mezopotamyayê re axivî.
Karamûs destpêkê bal kişande li ser peymana dagirkirina Şengalê ya 9’ê Cotmehê ya 2020’an û wiha axivî,
“Peymana 9’ê Cotmehê, bêyî vîna xelkê Şengalê û bi hevkariya Tirkiyê hat îmzekirin.
Dibe ku di demên pêş de li ser Şengalê êrîşek pêk were.
Niha jî PDK dixwaze ku vegere Şengalê û li Şengalê bi cih bibe.
Armancên PDK’ê jî xuya ne û ne ji bo xebateke sîyasî li Şengalê bi cih bibe.”
Karamûs da zanîn ji bo ku Şengal xwe ji êrişan biparêze pêdivîya wê bi statuya xweser heye û da zanîn statuya Xweser ya Şengalê ji bo Kurdan mijareke netewî ye.
Karamûs got,
“Ji hêla leşkerî, aborî, civakî û perwerdehiyê ve divê Şengal bibe herêmeke ku bikaribe xwe bi rê ve bibe.
Bi hezaran peşmergeyên PDK’ê li Şengalê hebûn.
Lê dema ku civaka êzidî bi êrişa DAIŞ’ê re rû bi rû ma, beyî ku yek fîşekekî biteqînin, reviyan û çûn.
Ji ber vê yekê hêzên PDK’ê tu baweriyê nadin civaka Êzidî.
Israra PDK’ê ya ji bo bicihbûna li Şengalê daxwaza Tirkiyê ye.”
Ehmed Karamûs: PDK bi hevkariya bi dewleta Tirk re ziyanê dide yekîtiya netewî ya Kurd
Ehmed Karamûs helwesta PDK’ê ya li dijî xebatên Yekîtiya Netewî jî nirxand û anî ziman rewşa ku PDK di nav de ye, di warê parastina berjewendiyên kurdan de bi şik û bi gumane.
Karamûs wiha got,
“Tevgerên PDK’ê bandorê li xebatên yêkitiya neteweyî ya Kurdistanê dike. Îro rewşa siyasî û hişmendiya PDK’ê nakeve xizmeta parastina deskeftiyên kurdan. PDK li pêş yekîtiya kurdan asteng e.
Hevserokê KNK’ê Ehmed Karamûs diyar kir li Kurdistanê pêdivî bi siyaseteke netewî heye û nirxandina xwe bi van gotinan bi dawî kir,
“PDK tenê parastina malbat û eşîrekê dike. Bi şêwazên eşîrtî û malbatî statûya siyasî nayê bidestxistin. Ji me kurdan re tişta pêwîst ew e ku tifaqa xwe ava bikin.”
