Endama Komîteya Navendî ya PKK’ê Dilzar Dîlok komploya navnetewî ya li dijî Rêber Abdullah Ocalan nirxand û weke komploya li dijî hemû gelên berxwedêr bi nav kir û da zanîn ku sîstema li Îmraliyê ji hiqûqê dûr ketiye, em ê ji bo misogerkirina azadiya fîzîkî ya Rêber APO têbikoşin.
Endama Komîteya Navendî ya PKK’ê Dilzar Dîlok der barê salvegera komploya navneteweyî ya 15’ê Sibata 1999’an ku li dijî Rêber Abdullah Ocalan hate kirin nirxandin kir.
Dilzar Dîlok diyar kir ku Rêber Apo 24 sal in li girava Îmraliyê dîlgirtî ye û got: Em di bin zexta pergaleke mîna pergala Îmraliyê de dikevin sala 25’an dîlgirtina Rêbertî.
Komploya navneteweyî ya li dijî Rêbertiya me hate pêşxistin, di dîroka Kurdistanê de weke êrîşa herî mezin a qirkirinê derbasî dîrokê bû.
Dilzar Dîlok: Pergala li Îmraliyê ji hiqûqê dûr ketiye
Dilzar anî ziman ku piştî Rêber Ocalan hat girtin, êrişên qirkirinê yên li dijî Kurdan û PKK’ê bi rengekî herî hovane berdewam kirin.
Pêvajoya tasfiye û îmhayê ku di dema AKP’ê de di bin navê pêvajoya çareseriyê de pêş ket, ji van êrîşên qirkirinê yên herî sexte, qirêj û durû ye.
Lewma zîhniyeta ku Rêber Apo bi komployeke dîl girt û zihniyeta ku darizand, heman zihniyet e.
Ev rewş diyar dike ku sîstema bi navê hiqûqê çiqas ji heqîqetê dûr ketiye.
Dilzar Dîlok: Paradîgmaya Rêber Apo bi azadîxwaziya jinê tê nas kirin
Endama Komîteya Navendî ya PKK’ê da zanîn hêmana herî giring ku fikirên Rêber APO li dinyayê deng didin ew e ku paradîgmaya me bi azadixwaziya jinan e.
Bi paradîgmaya bi azadîxwaziya jinan, bi jinên Kurd re hişmendiyeke xurt a hebûn û azadiyê ava bû.
Hişmendbûna jinên Kurd û geşkirina têkoşîna ji bo azadiyê, kirina pêşengtiyê ji vê têkoşînê re, di vê maneyê de gihîştina hev bi Rêbertiyê re jî bi vê sayê bû.
Dilzar Dîlok: Têkoşîna li dijî tecrîd û komployê dewam dike
Di dewama axavtina xwe de Dilzar Dîlok wiha bi lêv kir: Yên ku pergala Îmraliyê ava kirine, di serî de welatên Yekîtiya Ewropayê û Emerîka ne.
Mînaka herî dawîn ku bi CPT’yê şênber bû.
Zext û tecrîda girankirî ya li dijî Rêber Ocalan berdewam e.
Têkoşîna li dijî komployê berdewam e, hestyarî heta tu bibêjî heye, daxwazên gel jî nîşaneya vê ne.
Mirov dibîne ku wê ev çalakî ji serê sala 2023’an û pê ve bi lez û bez zêde bibin.
Dilzar Dîlok: Em ê ji bo misogerkirina azadiya Rêber Apo têbikoşin
Endama Komîteya Navendî ya PKK’ê Dilzar Dîlok tekez kir ku ew lehengên dîrokê yên çalakiya “Hûn nikarin roja me tarî bikin” li dar xistine, bi rêzdarî silav dike û got: Yekane armanca me ew e ku em îradeya xwe ya ku em Sibateke din a bê Rêbertî pêşwazî nekin û di têkoşîna ji bo misogerkirina azadiya fîzîkî ya Rêber Abdullah Ocalan de bi ser bikevin.
