Amerîkayê piştî êrîşên li dijî baregeha li Urdinê ku di encamê de sê leşkerên Amerîkî hatibû kuştin, planên bersivdanê dike.
Rayedarên Amerîkî diyar dikin ku ew bi Îranê re naxwazin bikevin nava şer, lê ji bo parastina leşkerên xwe her tiştî bikin.
Her wiha Îranê jî efserên xwe yê payebilind ê li Sûriyê vekişand.
Sê leşkerên Amerîkî roja Yekşemê li Urdunê, li nêzîkî sînorê Sûrî, di êrîşeke dron de hatin kuştin.
Rêveberiya Amerîkayê îdia kir ku Îran li pişt vê êrîşê ye û ragihand ku ew ê bersivê bidin.
Dewletên Yekbûyî yên Amerîkayê (DYA) ji bo tolhildana lêdana baregeheke leşkerî ya li Urdunê, plana lêdana hedefên Îranê yên li Sûriye û Iraqê pejirand.
Rayedaran diyar kirin ku artêşa Amerîkî dikare di şert û mercên hewayê yên xirab de êrîşan pêk bîne, lê anîn ziman ku wan ji bo kêmkirina metirsiya lêdana “bi xeletî” li sivîlan, baldar bin.
Amerîka: Ji bo parastina leşkerên xwe her tiştî bikin
Li welêt bi taybetî siyasetmedarên Komarî diyar kirin ku divê Biden rasterast operasyonekê li dijî Îranê bike, lê Biden diyar kir ku ew li dijî metirsiya şerekî herêmî ye û nîşan da ku bijardeya Îranê li ser masê nîne.
Tê pêşbînîkirin ku cenazeyên sê leşkerên Amerîkî yên di êrîşa li Urdinê de hatine kuştin roja înê bên vegerandin baregeha Hêza Esmanî ya Delaware.
Qesra Spî ragihand ku Serok Biden dê beşdarî merasîmê bibe.
Efserên Payebilind ê pasdarên Îranê ji Sûriyê vekişîn
Pasdarên Şoreşa Îranê biryar da ku piştî êrîşên hewayî yên Îsraîlê efserên xwe yên payebilind ji Sûriyê vekişîne.
Pasdarên Şoreşa Îranê 10 sal berê ji bo alîkariya Beşar Esed di şerê navxweyî yê li Sûriyê de, hat vî welatî.
Îran ku piştgira herî xurt a Hamasê ye, tevî ku piştgirîya çek û aborî dide komên dijminên Îsraîl û Amerîka yên ku li Lubnan, Iraq, Sûriyê û Yemenê şer dikin jî, hewl dide xwe ji şer dûr bigire.
Rayedarekî payebilind ê ewlekariya herêmê ku agahî ji Tehranê girt, anî ziman ku fermandarên payebilind ên Îranî li gel bi dehan efserên ‘navînî’ ji Sûriyê derketin.
Rayedarê ewlekariyê ev yek wekî ‘Hebûna Îranê li Sûriyê kêm dike’ bi nav kir.
Çavkaniyan diyar kirin ku Pasdarên Şoreşa Îranê dê niha bi piştgiriya Hizbullaha Lubnanê ‘operasyonên xwe yên li Sûriyê ji dûr ve birêve bibe’.
