Komîteya destûra Sûriyê civîna xwe bê encamp bi dawî kir û di nava nakokiyan de ma.
Nûnerên hikumeta Şamê û komên girêdayî dewleta Tirk tenê behsa serweriyê û desthildariya Sûrî kirin û dagirkeriya Tirk ji bîr kirin.
Li gel bidûrxistina nûnerên beşekî mezin û ewle yê Sûriyê, gera 5. a danûstandinên komîteya destûrê ya Sûriyê di navbera nûnerên hikumeta Şamê û komên girêdayî dewleta Tirk de li Cinevê li dar ket.
Vê carê maseya Mosko û Qahîrayê jî ne hazir bûn.
Nûnerê NY yê Sûriyê Geir Pedersen rasterast danûstandinên siyasî yên berî niha ku negihaştin ti encamê rexne kir û banga giftûgoyeke avaker li herdu aliyan kir.
Lê weke her car ev aliyên navborî ji bîr kir ku ew ji bo çareseriya aloziya Sûriyê û ne ji bo biparvekirina hikumê welêt li hev kom bûne.
Jixwe li wir tenê gotin tên kirin û ew jî qet hev nagirin..
Qaşo behsa destwerdana derve dikin û kesên hazir bixwe beşekî Sûriyê hipîhazir daye Tirkiyê.
Hat ragihandin ku endamên komîteyê ajandeyên hefteya pêşiya xwe di ber çavan re derbas kiriye da rêgezên sereke yên destûrê û pîvan û hêmanên sereke nîqaş bikin.
Hat gotin jî ku şandeya hikumeta Şamê Ehmed El-Kizberî pêşniyarên girêdayî xebatên gerê û mekanîzmeya nirxandina rêgezên bingehîn ên destûrê red kirine.
Çavkaniyên Ronahî TV xalên ku di civîna Komîteya Destûrî de hatin nîqaşkirin ji me re eşkere kirin:
- Herdu aliyên ku destên derve di Sûriyê de dirêj kirine û hebûna wan rewa dikin, behsa redkirina dagirkeriyê û parastina sînor kirin.
- Behsa seweriya Sûriyê û qanûn û mafên birêxistinkirin û serbixwebûnê jî kirin.
- Nîqaşa avakirina lihevkirinan der barê siyaseta dewletê de jî kir.
- Ferzkirina desthilatdariya hikûmetê li ser tevahî xaka Sûriyê û her wiha birêvebirina hilbijartinan jî bû mijareke civînê.
Ev xalên hatin nîqaşkirin, tê de behsa dagirkeriya dewleta Tirk nehat ser lêvan û destwerdana wê li xaka Sûriyê jî qet nehat redkirin.
Bi vê nîqaşê re, eşkere xuya dibe ku civînên ji bo biparvekirina kurisyê tên lidarxistin, weke yên berî xwe tenê xerckirina demê ne û li wê navê bê encam dimînin.
Jixwe di civînên komîteyê de, gelek nûnerên Sûriyê hatine paşguhkirin, vê dawiyê jî Nûnerê NY yê Sûriyê bêhêvîbûna xwe anîbûn ziman ku pêwistî bi beşadarbûna hemû nûnerên Sûriyê heye.
Tê payîn, gera niha heta 29’ê vê mehê bi çavdêriya Pederson berdewam bike û rojê du civîn li dar bikevin.
