Dewleta Tirk ya dagirker û çeteyên xwe di nava sê salên dagirkeriya li Efrînê de bi her awayî sûc û hovîtî pêk anîn û hê jî dewam dikin.
Di nava sê salan de zêdeyî 300 hezar welatiyên Efrînê hatin koçber kirin, 400 hezar kes ji derve li Efrînê hatin bi cih kirin, 650 kesên sivîl hatin qetilkirin û nêzî 8 hezar kes jî hatin revandin.
Rêxistina Mafên Mirovan a Efrîn- Sûriyê bîlançoya sûcên artêşa Tirk a dagirker û çeteyên wê yên 3 salan yên li Efrînê eşkere kir.
Rêxistinê diyar kir ku artêşa Tirk a dagirker û çeteyên wê piştî dagirkirina Efrînê zêdetir 300 hezar welatiyên Efrînê bi darê zorê koçber kirin.
Piştî dagirkirina Efrînê dest bi guhertina demografya wê hat kirin û heta niha jî berdewam dike.
Rêxistinê diyar kir ku dagirkeran zêdeyî 400 hezar kesên ji derve li gund û navçeyên Efrînê bi cih kirin.
Navên cih û deveran hatin guhertin û zimanê Tirkî hat ferzkirin
Rêxistinê da zanîn ku dagirkeriya Tirk navên qadên sereke yên navenda bajarê Efrînê guhertin. Hat gotin,
“Navê Qada Azadî kir Qada Ataturk, navê Çerxerêya Newroz kir Selahedîn, navê Çerxerêya Wetanî kir 18’ê Adarê û navê Çerxerêya Kawayê Hesinkar kir Şaxê Zeytûnê.”
Hat diyar kirin navê gelek gundan jî hatin guhertin û navên Tirkî li wan hatin kirin û perwerdeya bi zimanê tirkî li dibistanan ferz kir û alên Tirkiyê li cihên xwendekaran xistin.
Li aliyê din hat diyar kirin li hemû herêmên ku dagirkirî, welatiyan neçar dikin ku nasnameyên tirkî derxin.
Nêzî 8 hezar sivîl hatin revandin
Dagirker li Efrînê bi hêcetên cuda rojane welatiyan direvînin û fîdye li ser wan ferz dikin.
Rêxistina Mafên Mirovan a Efrîn -Sûriyê eşkere kir ku dagirkeran di nava 3 salan de zêdeyî nêzî 8 hezar sivîl revandine û aqûbeta zêdeyî nîvê vê hejmarê ne diyar e.
Rêxistinê bal kişande li ser sûcên ku dagirkeran li dijî jinan pêk anîne û diyar kir 83 jin hatine kuştin, 5 jinan xwe kuştine û destdirêjî li 70 jinan hatiye kirin.
Di nava sê salan de nêzî 650 sivîl hatin kuştin
Li gorî Rêxistina Mafên Mirovan a Efrîn-Sûriyê, dagirkeran di nava sê salên dagirkeriyê de nêzî 650 sivîl kuştin.
Hat diyar kirin ji wan 500 ji ber topbaranê, 82 kes bi êşkenceyê hatin qetilkirin. Hat diyar kirin piraniya wan jin û zarok 705 kesên sivîl jî birîndar bûn.
Dagirkeran tevî kuştin û revandinê xwezaya Efrînê jî bê navber talan û wêran kirin.
Rêxistinê eşkere kir ji destpêka dagirkirina Efrînê ve û heta niha, dagirkeran 327 hezar darên zeytûnê û darên din jê kirin û şewitandin û her wiha dest danîn ser bi hezaran malên sivîlên ku hatine koçberkirin.
Rêxistinê bal kişande li ser wêrankirina cih û deverên dîrokî yên li Efrînê û hat diyar kirin pirraniya girên dîrokî hatin kolandin û talankirin, 28 cihên dîrokî û embar hatin wêrankirin, zêdetirî 15 tirbên olî hatin rûxandin.
