30 roj in nûnerên Rêveberiya Xweser û PYD`ê ji aliyê hêzên PDK’ê ve hatine revandin, tevî hemû bangan jî ti agahî ji wan nayê girtin.
Endamê Desteya Hevserokatiya PYD’ê Aldar Xelîl daxwaz ji PDK’ê kir kir ku bi lez her 3 nûneran berdin.
Endamê Nûnertiya Rêveberiya Xweser yê li Başûrê Kurdistanê Cemîl Rehmano jî diyar kir ew derbarê jiyana hevalên xwe de bi fikar in.
10’ê Hezîranê nûnerê Rêveberiya Xweser yê li Hewlêrê Cîhad Hesen û endamên PYD’ê Mustefa Xelîl û Mistefa Ezîz dema diçûn pêşwaziya mêvanên xwe li balafirgeha Hewlêrê, ji hêla hêzên PDK’ê ve hatin revandin.
30 roj in tevî hemû bangan jî ti agahî ji wan nehatiye girtin.
Ji wê demê û heta niha daxwazên Rêveberiya Xweser û PYD`ê yên diyarkirina cihê endamên revandî û sedema revandina wan ji aliyê hêzên PDK`ê ve bê bersiv tên hiştin.
Aldar Xelîl: Divê bilez her 3 nûner werin berdan
Endamê Desteya Hevserokatiya PYD’ê Aldar Xelîl duh li ser hesabê xwe yê tiwîtterê daxuyaniyek da û daxwaza berdana bilez a her 3 nûneran kir.
Cemîl Rehmano: Heta niha PDK’ê tu agahî li ser çarenûsa hevalên me nedaye
Endamê Nûnertiya Rêveberiya Xweser li Başûr Cemîl Rehmano jî îro têkildarê mijarê ji televezyona me re axivî.
Cemîl Rehmano destnîşan kir ku heta niha tu agahî der barê hevalên wan de nehatine bidestixitin.
Rehmano da zanîn ji ber gelek agahî têne belavkirin ku radestî dewleta Tirk hatine kirin ji lewra jî ew derbarê jiyana hevalên xwe de bi fikar in .
Rehmano diyar kir ku wan gelek hewldan kirine da ku çarenûnsa hevalên xwe bizanibin lê PDK’ê hemû daxwazên wan bêbersiv hiştine.
Cemîl Rehmano anî ziman ku girtina endamên wan ên ku bi rengekî fermî li Başûr karê xwe yên dîplomatîk didan meşandin derveyî zagonan e.
Rehmano da zanîn ev kiriyarên PDK’ê nakeve xizmeta berjewendiyên Kurdan û bandorê li ser peywendiyên Başûr ê Rojava dike.
