Rojnamevan û nivîskar Fuat Kav ku bixwe şahidê berxwedana Zindana Amedê ye diyar kir Berxwedana 14’ê Tîrmehê ji bo gelê Kurd bû manîfesto û ber bi şoreşê ve bir.
Fuat Kav bal kişande li ser berxwedanên ku îro li zîndanan û berxwedana Rêber Apo a li Îmraliyê got, “berxwedana Îmraliyê 14 ‘ê Tîrmehê didomîne û berxwedaneke mezin a navnetewî ye.”
Bi boneya salvegera 39’an ya Berxwedana Mezin a 14’ê Tîrmehê rojnamevan û nivîskar Fuat Kav ku bixwe jî di berxwedana Zindana Amedê de cih girtibû û pirtûka ‘Mirovên Wêrek’ li ser tiştên ku di wê pêvajoyê de qewimîne, nivîsandiye ji ANHA’yê re axivî.
Fuat Kav bi van gotinan behsa serdama ku jiyankirî dike:
“Berxwedana Rojiya Mirinê ya Mezin a 14’ê Tîrmehê di sala 1982’yan de pêk hat, wê demê pêvajoya 12’ê Îlonê bû û Desthilata Leşkerî ya faşîst bi serkêşiya Kenan Evren li welat serdest bû.
Derbeya 12’ê Îlonê di sala 1980’yî de bierêkirina hêzên navneteweyî pêk hat û armanca bingehîn a derbeyê tesfiyekirina tevgerên şoreşger û tunekirina tevgera azadiyê ya Kurd bû.
Her wiha li ser Zindana Amedê jî dest bi zextên giran hatin kirin.”
Kav diyar kir ku dijî zextan rêbertiya PKK’ê bi biryardariya li dijî teslimiyet û xiyanetê û mezinkirina têkoşîna azadiyê ya Kurd li zindanan li ber xwe da û wiha çalakiya Rojiya Mirinê ya Mezin a 14’ê Tîrmehê derkete holê.
Kav: Heke sîstem ser bingeha tunekirinê ava bibe, dê berxwedan jî dewam bike
Rojnamevan û nivîskar Fuat Kav anî ziman ku heke sîstem xwe li ser bingeha tunekirinê ava bike, dê berxwedana li zindanan jî dewam bike û got,
“Bi deh hezaran mirov îro li Zindanan li ber xwe didin û di grevên birçîbûnê de divê wek parçeyek ji berxwedana zindanan a berê bên dîtin.
Berxwedana Îmraliyê bûye qada ku çalakiya 14 ‘ê Tîrmehê xurt dike, çalakiya 14 ‘ê Tîrmehê bi nav û deng dike û dike hêlîna pêvajoyek mezin. Qada berxwedana Îmraliyê gelekî kûrtir e.”
Fuat Kav: Ger Erdogan zindana Amedê birûxîne jî, wê ev bîr qet neyê jêbirin
Derbarê axaftina Erdogan ya li Amedê ku digot ew ê Zindana Amedê veguherînin navendeke çandê, Fuat Kav destnîşan kir ku Zindana Amedê ji bo hemû gelan bîr û hafize ye, ji bo wê divê Zindana Amedê veguhere muzexaneya êşkenceyê.
Fuat Kav di dawiya axaftina xwe de got ku ger Erdogan Zindana Amedê birûxîne jî, cihê wê di bîra gelê Kurdistanê de gelekî cuda ye û ev bîr qet nayê jêbirin.
