Endamê Komîteya Rêveber a PKK’ê Mûrad Karayilan derbarê sûc û hovîtiya ku dewleta Tirk û çeteyên xwe li Efrînê dikin diyar kir ya ku dewleta Tirk li Efrînê dike qirkirine û da zanîn dewletên Ewropa, Rûsya û Amerîka jî bûne aliyekî vê qirkirinê.
Karayilan li ser bîryarên Belçîka û Hollandayê yên li ser naskirina Qirkirina Êzidyan jî got, li gorî vê bîryarê divê nêzîkatiyên siyasî, aborî jî bê nîşandan.
Karayilan destnîşan kir ku wê hesabên qirkirina Şengalê û ya Efrînê bên pirsîn.
Endamê Komîteya Rêveber a PKK’ê Mûrad Karayilan derbarê sûc û hovîtiya ku dewleta Tirk û çeteyên xwe li Efrînê pêk tînin û naskirina Qirkirina Şengalê de ji ANF’ê re axivî.
Karayilan bi bîr xist ku ji sedî 95 zêdetir xelkê Efrînê Kurd bûn û da zanîn ew hatin koçberkirin û li şûna wan xelkên din hatin bi cih kirin û wiha got,
“Tiştê niha dewleta Tirk li Efrînê dimeşîne qirkirine. Li Efrînê paqijiya etnîkî tê kirin. Ji ber ku dewletên Ewropî, Rûsya û Amerîka çavên xwe lê digirin ew jî berpirsyar in û bûne aliyekî qirkirinê. Herî dawî dewleta Tirk li Efrînê êrîşî şehîdgehan dike. Ev yek careke din rastiya dewleta Tirk li Efrînê nîşan dide.”
Mûrad Karayilan da zanîn tiştên ku dewleta Tirkiyeyê li Efrînê dike ji bo mirovahiyê rûreşî ye û diyar kir wê hesabê van qirkirinan bê pirsîn.
Karayilan anî ziman ku dewleta Tirk dixwaze siyaseta xwe ya qirkirinê ya li Kurdistanê bi ser bixe û destnîşan kir li hemberî têkoşîna gel û tevgera azadiyê ku her roj diçe bilind dibe û wê ew têk biçin.
Karayilan: Divê Holanda û Belçîka li gorî bîryara xwe nêzîkatiyên siyasî nîşan bidin
Endamê Komîteya Rêveber a PKK’ê Mûrad Karayilan derbarê biryarên dewletên Belçîka û Hollandayê yên li ser naskirina Qirkirina Êzidyan jî axivî û da zanîn ev bîryar bi derengî jî be tiştekî baş e.
Karayilan destnîşan kir divê li gorî vê bîryarê nêzîkatiyên siyasî û aborî jî bê nîşandan û got,
“Beriya her tiştî ev berpirsyarên vê jenosîdê divê bên dadgehkirin. Dewletên li pişt kî bûn divê bêne zelalkirin. Jinûve hewceyî bi avakirina Şengalê heye.”
Karayilan fermanên ku di dîrokê de li ser civaka Êzidî hatine kirin bibîr xist û da zanîn ji ber wê hewcehiya Êzidiyan bi xweparastinê heye û wiha dewam kir,
“Mafê Êzidiyan e ku xwe bibiparêzin û xwe bi rêvebibin. Divê ev mafê wan bê dayîn. Ev tiştekî rewa ye û demokratîk e.”
Karayilan bal kişande li ser êrîşên dewleta Tirk yên li dijî Şengalê û da zanîn komkujiyên ku DAIŞ’ê li Şengalê kir ji dewleta Tirk ne qut e.
