Xwepêşandanên ku li Parêzgeha Xûzistan ya Îranê ji ber pirsgirêka avê destpê kiribûn, dewam dikin. Xwepêşandan belavî parêzgehên din Îranê jî dibe û roj bi roj piştgiriya ji bo xwepêşanderan zêde dibe. Ciwan li hemberî hêzên rejîmê dest bi ‘Parastina Rewa’ kirine.
Li Parêzgeha Xûzistanê ku pileya germaniyê digihije 50 dereceyê, 15’ê Tîrmehê ji ber nebûna avê, xwepêşandan hatibûn destpêkirin.
Xwepêşandarên ku li Ehwaz a navenda parêzgehê destpê kiribûn, di roja 7’an de li gelek herêman belav bûn.
Di xwepêşandanên rojên destpêkê de 3 kes hatibûn kuştin.
Xwepêşandan duh bi şev jî dom kirin û roj bi roj piştgiriya ji bo daxwazên xwepêşanderan mezin dibe.
Li bajarên Xuzistan û gelek bajarên din ên Îranê gel rabûye ser xwe û xwepêşandan kirine.
Li gorî dîmenên li ser tora civakî belav bûne, hêzên Îranê dijî xwepêşanderan hêzê bikartînin.
Ji ber gengeşiya heyî, ji duh bi şev nayê zanîn bê ka tiştek bi xwepêşanderan hatiye yan na.
Li gorî hin dîmenên di torên medyaya dijital de hatine belavkirin, li Kirmaşan ciwanan duh êvarî li taxa Dere-dirêj ya bajêr, rê li trafîkê girtine û piştgiriya xwe ji bo xelkê Xûzistanê anîne ziman.
Herwiha li Kerec, Tahran, Esfehan û Meşhed jî xelk daketine kolanan û dirûşmeyên dijî desthilatê qêriyane.
Tê gotin ciwan li hemberî hêzên rejîmê, dest bi ‘Parastina Rewa’ kirine.
Li gorî agahiyan li bajarên Susen-gird, Şuş û Ehwaz di navbera hêzên rejîmê û welatiyan de pevçûn çêbûye.
Heta niha derbarê bûyeran de ti agahiyek bi dest neketiye.
Hêjayê gotinê ye ku hefteya borî bi destpêkirina xwepêşendanên Xûzistanê re, bi dehan hezaran hêzên ewlehiyê ji Tehran û bajarên din ên Îranê bo Xûzistan hatinbûn veguhestin.
