Endamên Kongresa Amerîkayê: Balafirên F-16 nefroşin dewleta Tirk

Daxwaza kirîna balafirên F-16 a dewleta Tirk, li Amerîkayê bû sedema nerazîbûnan.
Piştî hişyariya Veto ya endamên meclisa nûneran, dengê li dijî daxwaza Tirkiyê bilind dibe.

41 endamên din nameya ji Wezîrê Karên Derve Blinken re şandin û dijberiya xwe a li hemberî daxwaza Erdogan anîn ziman.
Wezîrê Karê Derve ê ber Mike Pompeo jî hewldana firotina balafiran ji bo Tirkiyê weke dij-qanûnî binav kir.

Şefê rêjîma Tirk Erdogan piştî hevdîtina li gel serokê Amerîkayê Joe Biden a civîna G-20’an îdîa kir ku wan di mijara kirîna balafirên F-16, ti helwsteke neyênî nedîtine.

Erdogan bi vê yekê xwest bêje, Amerîka wê daxwaza wan bicih bîne.

Siyaseta Waşîngton li dijî wê yekê ye ku Serokê welat Joe Biden daxwaza Tirkiyê ya kirîna 40 balafirên F-16 û nûjenkirina yên berê erê bike.

Bi taybet jî Meclisa Nûneran û Kongres.

Herî dawî komeke ji endamên Meclisa nûneran name ji bo Wezîrê Karên Derve Antony Blinken şandin û li dijî firotina balafirên F-16 derketin.

Ji demokrat û komargeran 41 parlementerî îmzeya xwe avêtin binê nameyê.

Di nameyê de tê bibîrxistin ku ji ber kirîna moşekên S-400 ji Rûsyayê, ceza li Tirkiyê hatin birîn û wiha dewam dike:

Di rewşa heyî de nirxandina daxwaza Tirkiyê jî şaş e. Bi taybet niha Tirkiyê pêwendiyên xwe ên leşkerî li gel Rûsyayê bihêz dike.

Lewma pêwîst e helwesta me zelal be. Eşkere ye ku Erdogan û hukûmeta wî qanûnên Amerîka û pîvanên NATO binpê kirine. Ji ber vê lazime Erdogan hesab bide.

Parlementerê komarger Gus Bilirakis ku bi xwe jî name îmzekiriye bal kişand ser binpêkirina dewleta Tirk û got:

Ji rewşa Tirkiyê xuya ye ku serokê wê Erdogan ê nijadperest ketiye pey xeyalên Osmaniya Nû.

Ev yek dihêle ku aramiya li herêmê were têkdan.

Wezîrê berê Mike Pompeo: firotina balafirên F-16 ji bo Tirkiyê dij qanûnî ye

Wezîrê Karê Derve ê ber Mike Pompeo li dijî daxwaza Tirkiyê a kirîna balafirên F-16 helwest nîşan da.

Pompeo anî ziman ku li şûna balafirên F-35, hewldana firtina F-16 dij qanûnî ye.

Pompeo mijarê ji televizyoneke Yûnanî re nirxand û got:

Divê hukûmeta Amerîkayê li gorî qanûnê tevbigere. Ez bawerim ku serok Biden wê wisa bike.

Yanî lazime were zanîn ku hevkarekî NATO nabe bibe xwedî sîstema parastina hewayî ya Rûsyayê.

Mike Pompeo Tirkiyê weke provokatîf binav kir û wiha got:

Me her gavê Tirkiyê hişyar kir ku ji gefên leşkerî û tevgerên dagirkeriyê dûr bikeve.

Back to top button