Meşa Tevgera Ciwanan a dirêj ya ber bi deriyê Sêmalka di roja duyemîn de îro dewam kir. Ciwanên ku tevlî meşê bûne diyar kirin heta rakirina tecrîdê û azadiya rêber Apo ewê têkoşînê bidomînin. Bang li hemû ciwnanan hate kirin ku li dijî êrişan û parastina destketiyan têkoşînê bikin.
Tevgera Ciwanên Şoreşger ên Sûrî û Yekitiya Jinên Ciwan ên Bakur û Rojhilatê Sûriyê bi silogana “Werin cenga azadiyê” li dijî êrişan û ji bo azadiya Rêber Apo dest bi Meşa Dirêj kir.
Meş duh êvarê gihaşt navçeya Tirbespiyê û îro di roja duyemîn de dewam kir.
Ciwanên beşdarî meşê bûne teqez kirin ku ew ê li dijî êrişên li ser herêmê li ber xwe bidin û heya azadiya fîzîkî ya rêber Abdullah Ocalan misoger bikin têbikoşin.
Di meşê de endama Rêveberiya Komîteya Ciwan û Werzîşê ya bajarê Qamişlo û endama Komîteya Amadekar a Meşa Dirêj a Ciwanan Nesrîn Hesen axivî û diyar kir ku ev meş bersiva êrişên dijmin e û wiha got:
“Dijmin nikare vîn û israra ciwanan a parastina destkeftiyên gelê xwe û piştgiriya berxwedana gerîla bişkîne.”
Nisrîn Hesen destnîşan kir ku divê ciwanên Kurdistanê hemû xwe bi rêxistin bikin û şerê taybet û êrişên li dijî herêmê têk bibin.
Endamê Rêveberiya Tevgera Ciwanên Şoreşger ê navçeya Girkê Legê Mistefa Mihemed jî axivî û diyar kir ku ciwan roleke mezin li dijî êrişên li ser Kurdistanê dilîzin.
Mistefa wiha got,
“Şoreşa Bakur û Rojhilatê Sûriyê bi berxwedana ciwanan dest pê kir û bi vê têkoşînê hemû êrişên li dijî herêmê têk birin. Ji lewre em dibêjin, ciwan hêza şoreşê ne.”
Endama Meclisa Ciwanên Partiya Yekîtiya Demokratîk PYD a Qamişloyê Laleşîn Ebd-Ellah jî axivî û dest nîşan kir ku divê li dijî planên dagirkeriya Tirk ên li ser herêmê, rêbazên şerê gelê şoreşgerî were meşandin.
Laleşîn Ebd-Ellah got:
“Em ê çalakiyên xwe heta pêkanîna azadiya fîzîkî ya rêber Ocalan berdewam bikin.”
Di dawiyê de Laleşîn Ebd-Ellah bang li tevahiya Kurdistanê kir ku li dijî siyasetên şerê taybet serî hildin û li ser bingeha felsefeya Ocalan xwe xurt bikin.