Piştî lehiya li Hewlêrê, ku welatî bi xwe taxên xwe paqij dikin, li dijî rayêdarên desthilatê bertek nîşandan. Welatiyan eşkere kirin , ti rayedarên desthilatê bi hewara wan nehatine û alîkarî neşandine. Li aliyê din li Silêmaniyê 10 rêxistinên civaka sivîl ji bo mexdûrên lêhiya Hewlêrê kampanyek alîkariyê ragihandin.
Di şeva 16’ê Kanunê de ji ber barana zêde lehî li gelek taxên Hewlêrê rabû.
Ji ber lehiyê 12 kesan jiyana xwe ji dest dan û ziyanek mezin bi mal û milkê welatiyan bû
Piştî lehiya li Hewlêrê, welatî bi xwe kolanên xwe paqij dikin.
Welatiyên malên wan ber lehiyê ketine, nerazîbûnên xwe ya ji vê yekê anîn ziman û li dijî desthilata herêmê ku alîkariya wan nekiriye bertek nîşan dan.
Welatiyê bi navê Mihemed Mecîd ê niştecihê taxa Roşinbîrî dibêje; ji sibê heya êvarî wan taxa xwe paqijkiriye û ti aliyek hikumetê bi hewara wan ve nehatiye.
Mihemed Mecîd, ji aliyên peywendîdar xwest sedema lehiyê bibînin û tiştên pêwîst bikin.
Welatiyê bi navê Hêriş Teha jî Hikumeta Herêmê û waliyê Hewlêrê rexne kir û got:
“Hikumet û aliyên peywendîdar kêmxemiyê dikin, me gelek caran li waliyê Hewlêrê geriya hertim got emê werin lê bi hewara me nehatin.
Me bi cîran û xizmên xwe re kel û pelên xwe ji malê derxist, hikumetê ti alîkariyek neda me”
Derbarê ziyana madî ya lehiyê de, berdevkê polîsên Parastina Şaristanî ya Hewlêrê Serkewt Kareş jî ku ji ajansa Rojnews re axivî da zanîn, bi sedan xanî û wesayît di bin avê de man û ziyana xelkê geleke.
Li Silêmaniyê 10 rêxistinên civaka sivîl kampanya alikariyê ragihand
Li aliyê din li Silêmaniyê 10 rêxistinên civaka sivîl bi daxuyaniyekE çapemeniyê kampanyayeke sê rojî ya alîkariyê ji bo mexdûrên lehiyê ragihandin.
Berdevkê kampanyayê Karzan Ehmed ji aliyên xêrxwaz, rêxistin û welatiyan xwest tevlî kampanyayê bibin da ku ew jî ji mexdûrên lehiya Hewlerê re bibin alîkar.
