Serok Biden budceya parastinê ya 768 milyar dolarî pejirand Serokê DYA Biden, Pêşnûme Qanûna Bandorkirina Parastina Netewî (NDAA) pejirand. Pêşnûmeya ku ji 768 milyar dolarî pêk tê, lêçûnên parastinê yên 2022’an di nava xwe de digre.
Beriya Biden, pêşnûme ji aliyê Meclisa Nuneran û Kongresê ve hatibû erêkirin. Di pêşnûmeyê de, xalên sereke yên Ûkrayna, Çîn, Rûsya û parastina Ewropa heye. Her wiha piştevaniya ji bo QSD’ê jî cihê xwe di pêşnûmeyê de digre.
Bi îmzeya Serokê DYA Joe Biden, Pêşnûme Qanûna Bandorkirina Parastina Netewî (NDAA) ya ku 740 milyar dolar ji bo Wezareta Parastinê (Pentagon), 27,8 milyar dolar ji bo lêçûnên parastinê yên di nav Wezareta Enerjiyê de û 0,4 mîlyar dolar jî ji bo lêçûnên din ên parastinê ku bi giştî 768,2 milyar dolar e, erê kir.
Li gor daxuyaniya nivîskî ya Qesra Spî, Biden peymana NDAAyê ya ku piştî nîqaşên mezin li Kongreya Amerîkayê hat qebûlkirin îmze kir.
NDAA di 7’ê Kanûnê de ji aliyê Meclîsa Nûneran û di 15’ê Kanûnê de jî ji aliyê Senatoyê ve hat erêkirin.
Qanûna ku dema kesek piştî teqawidbûna ji artêşa Amerîkayê bibe wezîrê Parastinê dema wê ji 7 salan bo 10 salan hat zêdekirin.
Ji bo sekreteriya giştî ji 5 salan bo 7 salan hat dirêjkirin.
Alîkariyên ji bo Ûkrayna hatiye zêdekirin
Di qanûna ku salane alîkariya leşkerî ya ji bo Ûkraynayê dihate kirin ji 250 bo 300 milyon dolarî hate zêdekirin.
Her wiha 4 milyar dolar ji bo Înîsiyatîfa Astengkirinê ya Ewropayê ya li dijî Rûsyayê û 100 milyon dolar jî wê ji bo welatên Baltîkê piştgirî were dayîn.
Di demekê ku pêşnûme 7,1 milyar dolar dide Înîsiyatîfa Pêşîlêgirtina Pasîfîk a li dijî Çînê, Wezareta Parastinê kirîna berhemên ji kargehên ku Ûygûr neçar dimînin li Herêma Xweser a Sîncanê kar bikin, qedexe dike.
Ji bilî NDAA, pêşnûmeyên Senatorê New Jersey û Serokê Komîteya Têkiliyên Derve yê Senatoyê Bob Menendez jî li NDAAyê hatin zêdekirin.
Menendez daxwaz kir ku ji nêz ve bernameya balafirên bêmirov û biçek a Tirkiyê (SÎHA) bê şopandin û alîkariya ji bo Azerbeycanê tê dayîn jî were rawestandin.
Xurtkirina hevkariya parastina leşkerî ya bi Yewnanîstanê re jî cihê xwe di qanûnê de digre.
Di nava vê de firotina balafirên F-35 ji bo Atîna jî heye.
Piştevaniya ji bo QSD’ê dewam dike
Di nava NDAA de çend xalên li ser Iraq û Sûriyê jî hene.
Di qanûnê de hatiye xwestin ku Serokê Amerîka Biden alîkariya Hêzên Sûriya Demokratîk QSD bike û stratejiyek berfireh ji bo Sûriyê pêşkêş bike.
Di qanûnê de hatiye ku çavkaniyên dahata Beşar Esed li Sûriyê ji aliyê Wezareta Derve ya Amerîkayê ve bên lêkolînkirin.
