Bi armanca bal kişandina ser hovîtî û êşkenceyên li girtîgehên Tirkiyê, girtiyan dest bi grêva birçîbûnê û rojiya mirinê kirine. Li Girtîgeha Jinan a Bakirkoyê ya li Stenbolê, 28 girtî ev 3 roj in di greva birçîbûnê de ne. Girtiya bi navê Denîz Tepelî jî ku bibû şahidê mirina Garîbe Gezer, dest bi çalakiya greva birçîbûnê ya bêdem û bêdorveger kir. Li girtîgeha Sîncanê ya li Enqereyî jî girtiya bi navê Sîbel Balaç dest bi rojiya mirinê kir.
Li girtîgehên Tirkiyê, li dijî girtiyên siyasî yên Kurd, kirinên dermirovî û binpêkirinên mafan bi dawî nabin.
Dewleta Tirk girtîgeh veguherandine cihê êşkence û kuştina têkoşerên Kurd.
Têne di nava mehekê de 8 girtiyên nexweş ji ber nedihatin derman kirin, jiyana xwe ji dest dan.
Ji bo ev rewşa xirab a li girtîgehan bi dawî bibin, girtiyan dest bi çalakiyên greva birçîbûnê û rojiya mirine kirine.
Li girtîgeha jinan a li Stenbolê 28 girtî ev sê rojin di grêva birçîbûnê de ne
Li Girtîgeha Jinan a Bakirkoyê ya li Stenbolê, 28 girtiyan bi armanca bal kişandina ser binpêkirinên li girtîgehan ev 3 roj in di greva birçîbûnê de ne.
Girtiyan mirinên di demên dawîn de yên li girtîgehan bi bîr xistin û ev tişt gotin:
“Dermankirina girtiyên nexweş nayê kirin, lêgerîn bi rengê serdegirtinê pêk tên, bi hincetên vala cezayên tecrîdê li girtiyan tê birîn, ewlehiya canê girtiyên ku li hucreyên yekkesî tên girtin nemaye û gef li me tên xwarin.”
Şahidê mirina Garîbe Gezer Denîz Tepêlî dest bi grêva birçîbûne kir
Hat ragihandin, hevala Garîbe Gezer yê girtîgehê û şahidê mirina Garibe, Denîz Tepelî jî di 27’ê kanûnê de dest bi çalakiya greva birçîbûnê ya bêdem û bêdorveger kir
Agahî ji aliyê Hevseroka Giştî ya berê ya HDP’ê Fîgen Yuksekdag ve ku bi Tepelî re li heman girtîgehê ye, hate ragihandin.
Fîgen Yuksekdag diyar kir ji ber şahidiya Tepelî ya di mirina Garîbê de nayê qebûlkirin û weke şahid nayê guhdarkirin dest bi çalakiya greva birçîbûnê kiriye.
Girtiya bi navê Sîbel Balaç bi daxwaza berdana girtiyên nexweş dest bi rojiya mirinê kir
Li girtîgeha Sîncanê ya li Enqereyê jî girtiya bi navê Sîbel Balaç jî, li dijî binpêkirinan dest bi rojiya mirinê kir.
Sîbel, bi daxwaza berdana girtiyên nexweş û bi dawî kirina binpêkirinên mafan, di 19’ê Kanûnê de dest bi rojiya mirinê dike.
Têkildarî mijarê Parêzera Sibêle, Ceren Yilmaz dibêje, dema Sîbel tê girtin lêgerîna tezî lê tê ferzkirin û ji roja hatiye girtin cezayên hucreyê dikşîne.
Ceren got, dosya ku Sîbel jê girtiye delîlên wê li holê tune ne û bang kir ku bila dengê muwekila wê bê bihîstin.
Dayika Sîbelê, Nuray Balaç jî destnîşan kir ku keça wê Sîbel ji ber li mafê xwe geriyaye hatiye girtin û got:
“Keça min ji bo dengê wê bê bihîstin ket rojiya mirinê.”
Girtiyê bi navê Hogir Batû 7 roj in di greva birçîbûnê de ye
Li aliyê din, girtiyê bi navê Hogir Batû jî ji ber li dijî lêgerîna gardiyanan ya tazî derdikeve rastî lêdanê tê û dest û lingên wî girêdidin.
Parêzere Batû ragihand ku mûwekilê wî Batû ji bo ku binpêkirinên li girtîgehan bi dawî bibin, ev 7 roj in di çalakiya greva birçîbûnê de ye.
