Rêveberiya Xweser a Bakur û Rojhilatê Sûriyê, Meclîsa giştî ya PYD’ê û Fermandariya YPJ’ê peyam dan û sala nû li gelê Kurd û li gelê Sûriyê pîroz kirin. Di peyaman de hevî hate kirin sala nû bibe sala aştî û avakirina Sûriyeke demokratîk û tifaqa gelê Kurd.
Gelê Kurd û gelên herêmê saleke din jî li pey xwe hiştin û derbasî sala 2022’an dibin.
Bi wesîleya sala nû peyam hatin dayîn.
Rêveberiya Xweser a Bakur û Rojhilatê Sûriyê bi vê boneyê peyamek weşand.
Rêveberiyê sala nû li gelê Sûriyê, dayîk û malbatênşehîdan û gelên cîhanê pîroz kir û hêvî kir ku sala nû bibe sala hezkirin û aştiyê.
Rêveberiya Xweser di peyama xwe di wiha got:
“Bi hêvî ne ku sala 2022’yan bibe sala aştî û hezkirina di navbera tevahî Sûriyan.
Her wiha bibe sala çareserkirina aloziya Sûriyê, vegera koçberan li bajar û gundên xwe.”
PYD: Hêviya me ewe ku di sala nû de Aştî û aramî li Sûriyê pêk were
Bi boneya heman mijarê Meclisa Giştî ya Partiya Yekitiya Demokratîk (PYD) jî peyemek belav kir.
PYD’ê sala nû li gelê Kurd û tevahî pekhateyên herêmê pîroz kir û hêvî kir sala nû bibe sala bidawîbûna aloziya Sûriyê û avakirina Sûriyeke demokratîk.
PYD’ê buyerên di nava salê de bi bîr xist û got:
“Tevî zehmetî û hemû astengiyan, me bi xwîna şehîdan destkeftiyên şênber pêk anîn.
Bi hev re me hêviyên xwe yên pêşerojê xêz kirin.”
PYD’ê destnîşan kir armanca wan a ji sala 2022’an, avakirina civakeke demokratîk ku hemû gelên herêmê û pêkhateyên wê mafên xwe yên rewa bi dest bixin û çanda xwe bi pêş bixin.
YPJ: Wê 2022 bibe sala Azadiya gelan
Fermandariya giştî ya YPJ’ê jî bi wesilêya sala 2022’an peyamek waşand û diyar kir bi hêza jinên berxwedêr wê sala 2022’an bibe sala azadiya gelan.
Fermandariyê bal kişande ser êrişên dagirkeriyê yên di nava salê de ku li dijî gel û bi taybetî jî li dijî jinên Kurd hatin kirin û da zanîn, bi saya têkoşîna şehîdan û bi bîr û baweriya gel, planên qirêj yê dijmin bi serneket in.
Herwiha, Fermandariyê, zext û tundiya di sala 2021’an de ya li ser jinên li Rojhilata navîn û Cîhanê jî bi bîr xist û got:
“Li beramberî van êrîşan li her qadên cîhanê jin li ser linga bûn û berxwedaneke bê hempa dan meşandin.”
Fermandariyê bi wesîleya sala nû bang li hemû jinan kir kû xwe li ser fikir û felsefeya azadîyê bi rêxistin bikin.