Rewşa girtiyên nexweş ên li zîndanên dewleta Tirk roj bi roj giran dibe. Hate diyar kirin, tevî raporên girtiyên nexweş ku “nikarin li girtîgehê bimînin” hene jî, lê Saziya Tiba Edlî ji ber fermana distîne berdana girtiyan asteng dike. Li aliyê din Nobeta Edaletê ya malbatên girtiyên nexweş jî di roja 30’emîn de berdewam dike.
Pergala tecrîdê ku di serî de di şexsê Rêber Apo de dane avakirin niha belavî tevahî girtîgehan kirine.
Êşkence û binpêkirinên mafan yên li girtîgehan di van demên dawî de gihiştiye asta herî jor.
Nexasim tevî bangên malbatan û rêxistinên sivîl girtiyên nexweş ne tên berdan û ne jî têne dermankirin.
Yek ji wan girtiyan ku nayê dermankirin yê bi navê Firat Nebîoglû yê (24).
Pirsgirêkên Firat yê guh û çav hene û her diçe kerr û korr dibe.
Her wiha gurçikên Firat jî xirabûne û têkildarî rewşa wî bijişk dibêjin ger neyê dermankirin herî zêde dikare 10 salên din bijî.
Ji bo balê bikişînin ser rewşa girtiyên nexweş li Enqerê civîna çapemeniyê li dar xist
Hêzên Têkoşîna Yekgirtî (BMG) ji bo balê bikişîne ser rewşa girtiyên nexweş li avahiya Rêxistina HDP’ê ya Bajarê Enqereyê civîna çapemeniyê li dar xist.
Li ser navê Hêzên Têkoşîna Yekgirtî Dogan Koç daxuyanî xwend û diyar kir ku nêzîkatiyên li hember girtiyên nexweş bi serê xwe êşkence ye.
Koç di dewamê de destnîşan kir ku tevî raporên “nikarin li girtîgehê bimînin” ên girtiyên nexweş hene jî lê Saziya Tiba Edlî (ATK) berdana girtiyan asteng dike û got:
“Ev sazî bi fermanê dixebitin û lewma berdana girtiyan asteng dike”
Koç bang li saziya tiba edlî kir demildest dawî li vê yekê bîne û ji bo girtiyên nexweş bikeve nava tevgerê.
Piştî daxuyaniyê endamê Komîsyona Girtîgehan a Komeleya Mafê Mirovan (ÎHD) a Şaxa Enqereyê parêzer Omer Farûk Yazmaci jî axivî û got:
“Tecrîda li Îmraliyê dest pê kir li çar aliyên Tirkiyê û li girtîgehan belav bûye”
Nobeta edaletê a malbatên girtiyên nexweş 30 roj in didome
Li aliyê din Nobeta Edaletê ya malbatên girtiyên nexweş û girtiyên ku înfaza wan hatiye şewitandin li Baroya Wanê dane destpêkirin di roja 30’emîn de dewam dike.
Serdana sazî û malbatên girtiyan jî ji bo nobetê didome.
Îro endamên Komeleya Mafên Mirovan (ÎHD) a Wanê serdana nobetê kirin.
Li ser navê malbatên girtiyan Aslihan Tîmûr axivî û diyar kir divê pişgiriya ji bo nobetê were mezinkirin
Aslihan bang li malbatan kir ku piştgiriyê bidin çalakiyê.
Serokê ÎHD’ê ya Wanê parêzer Mehmet Karataş jî di serdanê de axivî û anî ziman ku daxwazên malbatan daxwazên mirovî ne.
Karataş got: “Divê demildest girtiyên nexweş serbest bên berdan. Ev yek sûce û li dijî mafên mirovan e.”
