Ewropa difikire ku Rûsya bi êrişa li dijî Ûkrayna dixwaze wan parçe bike. Piştî civîna Wezîrên Karên Derve yê YE de, Jiseph Borrell got: Rûsya dixwaze me ji hev parçe bike lê em ji her demê zêdetir nêzî hevin. Putin jî got; Cezayên li dijî Rûsya hatine ferzkirin ragihandina şer e. Wezîrê Karên Derve yê DYA Blinken li sînorê Ûkrayna bû.
Ji ber rewşa li Ûkrayna, welatên Ewropa nava alarmê de ne.
Ji bo şerê li Kîevê derbasî welatê wan nebe, tevgereke zêde tê kirin.
Wezîrên Karên Derve yên Yekîtiya Ewropayê (YE) li paytexta Belçîka Bruksel ê bi rojeveke awarte li hev civiyan.
Nûnerê Bilind ê Têkiliyên Derve û Polîtîkayên Ewlekariyê yên Yekîtiya Ewropayê (YE) Josep Borrell piştî civînê daxuyaniyeke çapemeniyê da.
Josep Borrell got, “Rewşa Mirovî ya li Ûkraynayê her ku diçe ji ber bombebaranê nebaştir dibe.
Dibistan û nexweşxane tên wêrankirin.
Rûsyayê biryara hilweşandina Ûkraynayê da.
Borrell diyar kir ku Rûsya bi êrişa li ser Ûkrayna xwest wan ji hev belav bike lê ew ji her demê zêdetir biheve girêdayî ne.
Putin: Cezayên ser Rûsya ragihandina şerê li dijî me ye
Serokê Rûsyayê Vladimir Putin yê ku welatên rojavayî bi gefên nukleerî û şerê cîhanê yê sêyemîn dayî bêdengkirin, niha jî daxwaza xwe zêdetir dike.
Vladimir Putin diyar kir ku biryara destpêkirina operasyonên taybet ne hêsan bû û got:
Pêkanîna cezayên li dijî Rûsya, tê wateya ragihandina şerê li dijî me.
Artêşa Rûsya teqez wê bigihêje armanca xwe.
Wezîrê Karên Derve yê Amerîka li polonyayê ye
Wezîrê Karên Derve yê Amerîkayê Antony Blinken ji ber krîza li Ûkraynayê piştî serdanên li Brûkselê berê xwe da Polonyayê.
Li gorî daxuyaniya ji Koşka Spî ya hatî belavkirin, Cîgira Serokê Amerîkayê Kamala Harris wê di 9-11’ê Adarê de serdana Varşova û Budapeşte bike.
Serokê Amerîkayê Joe Biden jî duh bi Serokomarê Polonyayê Andrzej Duda re bi telefonê axivîbû.
Blinken: DYA û Polonya ji her demê zêdetir nêzî hevin
Antony Blinken li bajarê Rzeszow ê Polonya yê li sînorê Ûkraynayê ye bi Serokwezîrê Polonyayê Mateusz Morawiecki û Wezîrê Karên Derve Zbigniew Rau re civiya.
Blinken got: “Di warê parastinê de, hevkariyeke xurt di navbera Polonya û Amerîka de heye.
Wezîrê Amerîkî anî ziman ku ew ji her demê zêdetir nêzî Polonay bûne.
Pentagon bicihkirina Rûsya ya nukleerê ji nêz ve dişopîne
Berdevkê Wezareta Parastinê ya Amerîkayê (Pentagon) John Kirby diyar kir ku piştî fermana Putin a ji bo hişyarkirina hêzên stratejîk, ti guhertin di bicihkirina hêzên xwe yên nukleerî de nekiriye.
Kirby got: “Bê guman, weke her roj em vê yekê ji nêz ve dişopînin. Divê ez jî diyar bikim ku wezîr Lloyd Austin bi rêgirtina me ya stratejîk bawer e û bi rehetî parastina welatê xwe dike.”
