Cenazeyê Mehmet Sevînç bi dirûşmên “Şehîd Namirin” hat veşartin

Rewşa girtiyan li zîndanên dewleta Tirk her diçe giran dibe. Herî dawî duh girtîyekî din jiyana xwe ji dest da. Partiyên siyasî û rêxistinên civaka sivîl bang li dewleta tirk kirin ku dawî li polîtîkaya xwe ya kuştina girtiyan bîne. HDP’ê jî ji bo lêkolînkirina binpêkirinên mafên jiyanê yên li girtîgehan şandeyek ava kir

Dewleta Tirk girtîgeh veguherandine cihê mirinê.

Herî dawî duh girtiyê nexweş Mehmet Sevînç yê 63 salî ku 28 sal bûn girtîbû jiyana xwe ji dest da.

Malbata ku wesayîta cenaze nedanê, bi derfetên xwe duh bi şev cenaze anîn morga Mizgefta navçeya Darica ya Kocaeliyê

Cenazeyê Sevînç yê ku anîn Mizgeftê, ji aliyê mela ve bi hêceta ku “qedexe” ye nehat şûştin û wecibeyên olî nehatin pêkanîn.

Melayekî ku malbatê bi derfetên xwe anî, cenazeyê Sevînç şuşt û wecîbeyên olî pêk anîn.

Piştî nimêja di bin dorpêça polîsan de hate kirin, cenazeyê Sevînç bi dirûşmên “Şehîd namirin” hat veşartin.

Partiyên siyasî û rexistinên civaka sivîl: Divê dewlet dawî li polîtîkaya xwe ya kuştina girtiyan bîne

Ji ber mirinên li girtîgehan, gelek derdor li dijî vê rewşê nerazîbûnan nîşan didin.

Partiyên siyasî û rêxistinên civaka sivîl ên bajarê Îzmîrê bal kişandin ser mirinên li girtîgehan û bertek nîşandan.

Rêveberê Komeleya Xizmên Girtî û Hikûmxwaran Îsmet Akdemîr diyar kir ku binpêkirinên li girtîgehan di demên dawî de zêde bûne û got: “Bi navê heq û hiqûqê tiştek nema ye.”

Têkildarî mijarê Hevseroka Partiya Demokratîk a Gelan (HDP) a Îzmîrê Çinar Altan destnîşan kir li girtîgehan polîtîkaya kuştinê tê meşandin û bang li herkesî kir ku li dijî van sepanan têbikoşin.

Binpêkirinên mafa yên li dijî girtiyên siyasî û nexweş dewam dikin

Li aliyê din zext û binpêkirina mafa yên li dijî girtiyên nexweş dewam dikin û bi dawî nabin.

Nûnerê Rojnameya Azadiya Welat ê Dîlokê Ferhad Çîftçî ku niha di Girtîgeha Tekirdagê de ye, nameyek ji Komeleya Rojnamevanan a Dîcle Firatê (DFG) re şand.

Çîftçî, di nameya xwe de tîne ziman nexweşîya wî her diçe giran dibe û nayê dermankirin.

Herwiha Çîftçî diyar kiriye ku nikare bi tena serê xwe pêwistiyên xwe peyda bike.

Beyaz Çîftçî, dayika Ferhat Çîftçî, diyar kir ku 2 sal in kurê xwe nedîtiye û ji bo berdana girtiyên nexweş bang li rayedaran kir.

Nûrhan Yilmaz a li Girtîgeha Jinan a Gebzeyê tê ragirtin jî, ragihand ku girtiyên nexweş nayên dermankirin, bi awayekî keyfî cezayên dîsîplînê didin girtiyan.

Ji bo lêkolînkirina binpêkirinên mafa yên li girtîgehan HDP’ê şandeyek ava kir

Li aliyê din ji bo lêkolînkirina binpêkirinên mafan ên li girtîgehan, di cih de şopandina wan Partiya Demokratîk a Gelan (HDP) şandeyeke ava kir.

Şande dê li her herêmê rêxistinên civaka sivîl û parlamenteran jî tevlî vê xebatê bike.

Parlamenterên di nava vê şandeyê de cih digirin têkildarî mijarê axivîn û gotin:

“Heya binpêkirinên mafan bi dawî dibin em ê bixebitin.”

Back to top button