Komîteya Rêveber a PKK’ê: Gerîlla, faşîzma Tirk li gir û newalên Zapê binax dikin

Komîteya Rêveber a PKK’ê ragihandin ku tevgera azadiya Kurdistanê li bendê bû ku dewleta Tirk bi êrişeke nû ya dagirkeriyê rabe û got;
“Faşîzma Tirk di kêliya pêşî ya êrişê de li berxwedana dîrokî ya gerîlla rast hat û darbên giran xwarin.
Li dijî êrişa dijwar a dagirkeriyê û hevkariya PDK’ê, di serî de Kurd, divê Ereb û gelên herêmê piştevaniya PKK’ê bikin.”

Komîteya Rêveber a PKK’ê bi nêzbûna 1’ê Gulanê Roja Karkeran a Cîhanî daxuyaniyek da.

Komîteyê ragihand ku di van rojên ku gelê Kurd xwe ji pêşwazîkirina 1’ê Gulanê re amade dikir, faşîzma Tirk dest bi tevgereke nû ya qirkirinê kir û got:

Ji 17’ê Nîsanê ve li herêmên Zap û Avaşînê êrişeke nû ya dagirkeriyê dewam dike.

Weke tevger em li benda êrişeke wiha bûn.

Ji xwe hê di kêliya destpêkê de, gerîlayên leheng berxwedaneke dîrokî nîşan dan.

Ew niha faşîzma Erdogan û Bahçelî li gir û newalên Zapê binax dikin.

Komîteya Rêveber ragihand ku armanca vê êrişê ne tenê PKK’ê ye û got:

Êrişa dagirkeriya Tirk, Ereb û tevahiya gelên herêmê û mirovahiyê eleqedar dike.

Hêzên ku îdîa dikin ew li Ûkraynayê li dijî dagirkeriya Rûsyayê ne, bûne piştevanê xurt ê dagirkeriya dewleta Tirk a li Kurdistanê.

Komîteya Rêveber a PKK’ê: Dewleta Tirk tenê qîma xwe bi tinekirina PKK’ê nayîne

Divê were zanîn ku faşîzma Tirk tenê qîma xwe bi tinekirina gerîlla û PKK’ê nayîne.

Eger tevgera wan bi ser bikeve, wê dor bê PDK û rêxistinên din ên Kurd.

Komîteya Rêveber a PKK’ê teqez kir ew ê weke tevgera Apoyî bi hemû hêza xwe li ber dagirkeran rabin û got:

Hîmê siyaseta me berxwedan e û mejiyê qirkirin û faşîzmê ye.

Şer ne tenê li Zap û Avaşînê ye, şer li tevahiya Kurdistanê û Tirkiyê ye; lewma em ê şerê şoreşgerî yê li dijî faşîzma AKP-MHP’ê li her deverê belav bikin.

Bê goman ev erk ne tenê ye gerîlla ye. Berpirsiyarî ya herkesî ye.

Her ciwanekî Kurd şervanekî azadiyê ye; li cihê ku lê ye wê bi her cûre çalakiyan derbê li dagirkeran bide.

Komîteya Rêveber a PKK’ê: Rêveberiya PDK’ê di asta herî xerab de destekê dide dagirkeran

Komîteya PKK’ê îşaret bi wê yekê kir ku pir girîng e gelê Kurd li dijî hevkariya li gel dagirkeriyê rabe û got:

Têkoşîna li dijî qirkerî û dagirkeriyê ji a li dijî nokerî û xiyanetê ne cuda ye.

Vê gavê rêveberiya PDK’ê di asta herî xerab piştgiryê dide leşkerên dewleta dagirker.

Beramberî vê rewşê, helwesta partî û rêxistinên din jî lewaz e.

Di serî de gel û hêzên siyasî yên Ereb divê gelên li Rojhilata Navîn jî zanibin ku piştî Kurdan wê dor bê wan.

Siyaseta dewleta Tirk a heyî, di xeta Cemiyeta Îttîhat û Terakkî de çalak bûye.

Wê demê bêyî ku dereng bimîne divê piştevaniya Kurdan bê kirin û piştgirî ji berxwedana PKK’ê re bê dayin.

Komîteya Rêveber a PKK’ê: Em ê her tim bi gelê xwe yê Êzidî re bin

Komîteya Rêveber a PKK’ê aloziyên demên dawî li Şengalê rû da jî nirxand û ev peyam da:

Roja ku dewleta Tirk dest bi tevgera dagirkeriyê kir, artêşa Iraqê jî êriş bir ser Şengalê.

Ji ber vê yekê fikar çêbûn ku di navbera wan de planeke hevpar heye.

Helwesta hukûmeta Iraqê ya li hemberî Mexmûr û Şengalê dewama siyaseta qirker a dewleta Tirk e.

Li hemberî jiyana azad a gelê me ê Êzdî berpirsyariyên me hene.

Em ê ti carî wan bi tenê nehêlin.

Back to top button