Li Hindistanê pileya germahiyê gihişt 46’an. Ev yek jî raste rast di tevahî warên jiyanê de bandor kiriye. Saetên dibistanê hatin guhertin û banga hişyariyê li welatiyan hate kirin.
Li Hindistan germahiya ku ev 122 sale pêk nehatî, heye.
Rêveberiya Meteorolojiyê ya Hindistanê (IMD) bi daxuyaniyekê ragihand ku germahiya hewayê li hin herêmên welêt derket 46 pileyî.
Di daxuyaniyê de hate destnîşankirin ku pirsgirêkên tenduristiyê yên bi germahiyê li Hindistanê zêde bûne, ku germahiya hewayê di hefteyên dawî de di asta xeternak de ye.
Ji kesên ku nexweşiyên wan ên kronîk hene jî şîret kir ku li hundur bimînin.
Germahiya hewayê ya zêde tevî çandinî û çavkaniyên enerjiyê, bandoreke neyînî li ser tenduristiyê dike.
Di vê navberê de, IMD ji bo bahoza extratropîkal (ekstra-tropîkal) a li bakurê welêt hişyariyek zer da.
Rayedarên meteorolojiyê li bendê ne ku piştî bahozê germahiya hewayê li hin deverên welêt ji bo demekê kêm bibe.
Hikûmeta eyaleta Haryana ji ber germa zêde biryar da ku saetên hemû dibistanên eyaletê biguhere.
Li gorî vê biryarê ku li hemû dibistanên taybet û giştî yên eyaletê ji sala 1 heta 12’an pêk tê, wê di 4’ê Gulanê de ji saet 07.00 heta 12.00’an perwerde bê dayîn.
Ji bilî Haryana li eyaletên din, demjimêrên dibistanê hatine guhertin an rawestandin.
Germahî ji bo hilberîna genim gefe
Germahiya ku li Hîndîstan a duyemîn hilberînerê genimê cîhanê bi bandor bû, sektora çandiniyê jî xist xeterê.
Heta niha, ji ber şerê Rûsya û Ukrayna ku dabînkirina genim a cîhanî qut kiriye, gelek welatan çavên xwe dabûn Hindistanê.
Lê, germa zêde ya li Hindistanê pirsgirêka peydakirina bi xetereya hilberîna çandiniyê re girantir kiriye.
Ji ber germahiya meha Adarê ya ku ji sala 1901’an û vir ve gihaşt asta herî bilind, berhema genim gelekî kêm bû.
Ji aliyê din ve di demekê de ku li welat di santralên elektrîkê de kêmasiya komirê hebû, bi zêdebûna germahiya hewayê re gel serî li klîma dan.
Rêveberiya Meteorolojiyê ya Hindistanê daxuyand ku germahiya hewayê ya ku di meha Nîsanê de li herêmên bakur û navendî hat tomarkirin, 122 salên dawî germahiya herî bilind e.
