Dewleta Tirk ku bazariyê li ser welatiyên Sûriyê yên koçber bûne dike, niha jî amadekariyan dike ku wan li herêmên dagirkirî bi cih bike û demografaya wan herêman biguhere. Li dijî vê yekê jî nerazîbûn her diçin zêde dibin. Platforma Çalakiyên Hevbeş ên rêxistinên jinan û koçberên Efrîn, Serêkaniyê û Girê Spî ev kiryarên dewleta Tirk şermezar kirin û hat xwestin dagirkeriya li bajarên wan bi dawî bibe.
Dewleta Tirk a dagirker amadekariyan dike ku penaberên Sûrî yên li Tirkiyê li herêmên dagir kiriye, bi cih bike.
Bi vê yekê jî pilana xwe ya guhertina demografiya herêmê pêk tîne.
Li dijî van kiryarên Tirkiyê, nerazîbûn zêde dibin.
Bi sedan koçberên Serêkaniyê û Girê Spî ku li Kampa Newroz a Dêrikê dimînin, li qada Kampê kom bûn li dijî kiryarên dewleta tirk, daxuyaniyek dan.
Koçberan plana dewleta Tirk a ji bo bicihkirina penaberên Sûrî li herêmên dagirkirî, şermezar kirin.
Di dawiya daxuyaniyê de bang li rêxistinên hiqûqî û mirovî hat kirin ku pêşî li van binpêkirinên ku dewleta Tirk dike, bigrin.
Platforma hevbeş a rêxistinên jinan: projeya ‘guhertina demografîk’ xeternak e
Platforma Çalakiyên Hevbeş ên rêxistinên jinan a Bakur û Rojhilatê Sûriyê jî di vê çarçoveyê de, daxuyaniyek da.
Daxuyanî li çerxereya Efrîn a li bajarê Qamişlo hat dayîn.
Di daxuynaiyê de bal hat kişandin ser rewşa jinên li herêmên dagirkirî û hat gotin ku li wan herêman rojane jin tên revandin, destdirêjî li wan tê kirin û tên kuştin.
Pilana dewleta Tirk a bicihkirina koçberên Sûrî li herêmên ku dagir kirine, weke pilaneke xeternak a ji bo guhertina demografiya herêmê hat binavkirin.
Di dawiya daxuyaniyê de bang li civaka navnetewî hat kirin ku li hemberî van kirinên dewleta Tirk, erkên xwe pêk bînin û pêşî li guhertina demografî bigirin.
Kombenda koçberên Efrînê: Li hemberî pilanên dewleta Tirk rawestin
Bi heman armancê kombenda Koçberên Efrînê jî li Qamişlo daxuyaniyek da.
Di daxuyaniyê de bicihkirina koçberên Sûrî li herêmên dagirkirî hat şermezarkirin û bang li civaka navnetewî, saziyên mafê mirovan û aliyên têkildar hat kirin ku li pêşiya vê plana dewleta Tirk, rawestin.
Emîne Umer: Ev planeke metirsîdar e û armanc ferehkirina dagirkeriyê ye
Her wiha Hevseroka Meclisa Sûriya Demokratîk (MSD) Emîne Umer jî pêkanîna vê pilanê ji aliyê dewleta Tirk ve weke projeke metirsîdar bi nav kir û got:
“Dewleta Tirk dixwaze serweriya xwe li herêmê dagirkirî berfereh bike, herêmên Kurdan vala bike û çareseriya siyasî ya Sûriyê asteng bike.
Bêdengiya civaka navnetewî ya di vî warê de jî tê wateya erêkirinê.”
