Çalakiyên li dijî êrişên dewleta Tirk a dagirker dewam dikin. Îro jî li seranserî herêmê gelek çalakî hatin lidarxistin û daxuyanî hatin dayîn û hate gotin ew ê li dijî êrişan li kêla hêzên xwe yên parastinê li ber xwe bidin.
Gelê herêmê rojane li dijî êrişên dewleta Tirk a qirker di nava çalakiyan de ne.
Li Tebqa û Reqayê bi daxuyaniyeke hevbeş Meclisa Malbatên Şehîdan daxuyanî li dijî êrişan da.
Di daxuyaniyan de hate diyar kir armanca êrişên dewleta Tirk têkbirina aramî û ewlehiya li herêmê ye.
Her wiha bang li tevahî gelên cîhanê hate kirin ku piştgiriya gelê herêmê bikin.
Saziyên Civaka Sivîl: Bila qedexeya ezmanî li herêmê bê ferz kirin
Cardin li Tebqayê saziyên civaka sivîl daxuyanî dan û êriş şermezar kirin.
Hate gotin; Dewleta Tirk bi hinceta avakirina deverên ewle êrişên xwe li ser herêmê zêde kirin.
Em bang li aliyên peywendîdar dikin ku qedexeya ezmanî li herêmê ferz bikin.
TEV-DEM: Bila gelê Sûriyê li hember êrişên qirkirinê yekîtiya xwe ava bikin
Tevgera Civaka Demokratîk TEV-DEM ya herêma Efrînê li Kampa Serdemê daxuyanî da.
TEV-DEM’ê bang li gelê Sûriyê kir ku yekîtiya xwe ava bikin û li dijî êrişan bisekinin.
Rûspiyên Dêra Zorê: Em li pişta hêzên xwe ne
Rûspiyên eşîrên Dêra Zorê jî ji bo nîqaşkirina rewşa herêmê û armancên dewleta Tirk ji êrişên li ser herêmê civînek lidarxist.
Beşdarên civînê teqez kirin ku eşîrên li herêmê dê herdem li pişta hêzên xwe bisekinin.
Piştî civîn bi dawî bû rûspiyên eşîrên rojhilatê Dêra Zorê daxuyanî dan.
Di daxuyaniyê de bêdengiya navnetewî hate şermezarkirin û bang hate kirin ku êdî sînorekê ji van êrişên hovane re deynin.
Yekîtiya Endezyaran: Êriş wê nikaribin karê me rawestînin
Yekîtiya Peymandar û Endezyarên Bakur û Rojhilatê Sûriyê jî li dijî êrişan daxuyanî dan.
Di daxuyaniyê de hate gotin: “Em ê heya dawî karê xwe bimeşînin û deverên ku di encama êrişan de zerer dîtine ji nû ve ava bikin.
Ev êriş dê nikaribin karê me bidin seknandin.”
Yekîtiya mamosteyan li dijî êrişan daxuyanî da
Yekîtiya Mamosteyan jî bi heman armancê daxuyanî li Qamişlo da.
Mamosteyan bang li gelê herêmê kir ku li dijî êrişan bikevin nava çalakiyan.
Malbatên Şehîdan: Êrişên Tirkiyê rê li ber zindîkirina DAIŞ’ê vedike
Dîsa li Qamişlo Meclisa Malbatên Şehîdan û Meclisa Jin a Malbatên Şehîdan daxuyanî dan.
Di daxuyaniyê de hate gotin: “Dewleta Tirk bi gef û êrişên xwe yên rojane rê li ber zindîkirina DAIŞ’ê vedike.
Malbatên şehîdan bang li gelên herêmê kir ku bi berpirsyarên xwe yên netewî û şoreşgerî rabin û destketiyên ku bi saya şehîdan hatine bidest xistin, biparêzin.
