Li Iraqê ji ber siyaseta qirêj ya dewleta Tirk ya avê, roj bi roj av kêm dibe. Tirkiye bi îdiaya ku Iraq çavkaniyên avê vale vale xerc dike, av kêm kirine. Iraq jî dibêje, Tirkiye ji bo avê kêm bike li hincetan digere. Wezîrê Çavkaniyên Avê yên Iraqê ji Tirkiyê xwest ku hîn zêdetir avê di çemên Dîcle û Firatê de berde.
Dewleta Tirk demeke dirêj e avê weke çekekê li dijî cîranên xwe bi kar tîne.
Iraq yek ji pênc welatan e ku li pêşberî germahiya global û bandora çolbûyînê herî zêde bêparastin e.
Ji ber bendavên dewleta Tirk li ser ava Dîcle û Firatê ava kirî, ava li ser Iraqê dibire.
Ev yek jî bandoreke hîn giran li ser welat kiriye.
Wezîrê Çavkaniyên Avê yên Iraqê Mehdî El Hamdanî doh bi nûnerê taybet ê Serokomarê Tirk ê li Iraqê Veysel Eroglû re bi dîmen hevdîtinek kir.
Li gorî daxuyaniya nivîskî ya hikumeta Iraqê, herdu rayedar li ser “rêjeya avê ya ji çemên Dîcle û Firatê têne Iraqê axivîne.”
Di daxuyaniyê de hate gotin, “Wezîr Hamdanî ji aliyê Tirk xwest ku ji bo çareserkirina pirsgirêkên avê yên heyî yên Iraqê, hîn bêhtir avê berde.”
Li gorî heman daxuyaniyê rayedarê Tirk jî xizmetên avê yên li Enqereyê amade ye ku peyama ‘li gorî rezervên heyî rêjeya avê ya ku tê berdan rojên bê zêde bike” bidin.
Herdu aliyan li hev kirin ku “şandeyeke teknîkî ya Iraqê” ku xwedî erka “jinûve nirxandina rezervên avê” yên li bendavên li Tirkiyê ye, di demeke nêz de serdana Tirkiyeyê bike.
Ji ber barana kêm bariya, Iraq li ser hev sê salên ziwa derbas kir.
Li gorî nûçeyeke Ajansa Nûçeyan a Iraqê (ÎNA) ku roja Çarşemê weşand, rayedarekî Iraqî got,
“Rezervên avê li gorî salek berê bi asta ji sedî 60 kêm bûye.”
Rayedar anî ziman ku rêjeya ava heyî ya ji Dîcle Firatê tê, bi qasî ji sedî 35 ê rêjeya nîvekê ya ava di sed sala dawî de gihiştiye welat e.
