Li Iraqê her ku diçe nerazîbûn zêde dibe. Gelek rêxistin û partiyan nerazîbûn nîşanî êrişa li ser Zaxoyê da û gotin: Divê hemû rêyên bejahî û hewayî yên di navbera Iraq û Tirkiyeyê de werin girtin.
Nerazîbûnên li dijî êriş û komkujiyên dewleta Tirk her diçe zêde dibin.
Wezareta Karên Derve ya Iraqê li dijî komkujiya dewleta Tirk a li Zaxoyê pêk aniye, daxuyaniyek da û got: “Vê êrişê ewlehî û aramiya gelê Iraqê hedef girtiye.
Ev binpêkirina peyman û yasayên navdewletî ye. Em ê di vê derbarê de helwesta xwe ragihînin.”
Li ser asta herî bilind a dîplomasî wê bersiva Tirkiyeyê were dayîn.
CPT’yê derbarê komkujiya perexa zaxoyê de daxuyaniyek da
Rêxistina Tîmên Avakirina Aştiya Civakê ya Emerîkayê CPT jî bi daxuyaniyekê got:
“Ev ne cara yekem e ku li gundê Perex di bombebarana Tirkiyeyê de sivîl dibin qurbanî.”
CPT diyar kir ku ji Tebaxa 2015’an ta niha 138 welatiyên sivîl di êrişên Tirkiye yên li ser xaka Herêma Kurdistana Iraqê de şehîd bûne.
KNK: Komkujiya zaxo ji ber bêdengiya raya giştî çêbû
KNK’ê jî bi daxuyaniyeke nivîskî êrişa dewleta Tirk a dagirker şermezar kir û got:
“Ji ber bêdengiya raya giştî komkujî li Zaxoyê pêk hat.”
KNK’ê da zanîn ku operasyonên dewleta Tirk ên li herêmê dibin sedema bêîstiqrarî û xerabûyînê û wiha dewam kir; “Ev komkujiya dawîn a sivîlan a bi destê dewleta Tirk a dagirker nabe ku bê qebûlkirin û divê bertek li dijî wê bê nîşandan.”
Ebadî li dijî êrîşên Tirkiye banga hewlesteke yekgirtî û netewî dike
Serokê Hevpeymaniya Nesir û serokwezîrê berê yê Iraqê Heyder Ebadî jî li ser hesabê xwe yê fermî yê Twitter’ê komkujiya dewleta Tirk şermezar kir.
Ebadî bang li hêzên siyasî yên Iraqê kir ku bi awayekî yekgirtî li dijî êrîşên Tirkiye rawestin.
Ebadî ji hikûmeta Iraqê xwest bi awayekî fermî giliya Tirkiye bike û got: “Civaka navnetewî di ber van binpêkirinên Tirkiyeyê de berpirsyar e.”
Tevgera Goran: Êriş binpêkirina serweriya Iraqê ye
Berdevkê Tevgera Goran Dilêr Ebdulxaliq jî bi daxuyaniyekê helwesta partiya xwe ya li dijî êrişê nîşanda û got:
“Ev êrişa dewleta Tirk ya li ser xaka Iraq û Herêma başûrê Kurdistanê binpêkirinek eşkere a yasayên navdewletiye.
Tevgera Goran di dawiyê de got, tê xwestin sinorek li pêş êriş û komkujiyên dewleta Tirk were girtin.
Sedir li dijî komkujiya Zaxo nerazîbûnek tûnd nîşanda
Rêberê Tevgera Sedir Muqteda Sedir jî bi peyamekê helwesta xwe ya li dijî komkujiyê nîşanda.
Sedir di peyama xwe de xwest, peywendiyên dîplomasî yên li gel Tirkiyeyê werin kêmkirin û rêyên hewayî û bejahî yên dinavbera Iraq û Tirkiyeyê de werin girtin.
Di dawiyê Sedir xwest hikûmeta Iraq li Neteweyên Yekbûyî giliyê Tirkiyeyê bike û hemû peymanên ewlehiyê yên li gel Tirkiyeyê de werin betalkirin.
Piştî nerazîbûnên cidî yên Iraqê hikûmeta herêma Kurdistanê jî daxuyaniyek da!
Hikûmeta Herêma Başûrê Kurdistanê bi daxuyaniyekê êrişên dewleta Tirk a dagirker li ser welatiyan şermezar kir û got: “Ji bo rawestandina êrîşan daxwazê ji Hikûmeta Federal a Iraqê û Civaka navnetewî dikin ku gavên bi bandortir biavêjin.”
Di dawiya daxuyaniya Hikûmeta Herêma Başûrê Kurdistanê de careke din gerîlayên PKK’ê ku pêşî li dagirkeriya Tirk digirin, hedef girt û bi şêwazekî rewatî bi êrişan da û gotin: “Êriş ji ber pevçûnên navbera dewleta Tirk û PKK’ê de pêktên.”!
Xwepêşanderan ala Tirkiye daxistin û ofîsa vîzeyê girtin
Li dijî komkujiyên dewleta Tirk ên li dijî herêmên geştiyarî, welatiyên Kurd û Iraqî protesto li bajarên Iraqê destpêkir.
Welatiyên Necefê ku li ber Ofîsa Vîze ya Tirkiyeyê kombûn, ofîsê girtin û ala Tirkiye daxistin.
Hêzên Ewlekariyê yên bajêr ji bo girse ser navendên dewleta Tirk ên li bajêr de negirin, ketin tevgerê.
Li ser banga çalakvanên Iraqî tê gotin, wê îşev li Besra û paytexta Bexdayê xwepêşandan werin lidarxistin.
Çalakvanan daxwaza derkirina balyozê Tirk ji Iraqê jî dikin.
