Bi dirêjbûna şerê li Ukraynayê re bîlançoya şer giran tir dibe. Herî dawî dîtina goreke komî ya li bajarê Îzyumê careke din darizandina Rûsya li dadgehên navnetewî xist rojevê. Çekya ya ku serokatiya demkî ya YE dike, daxwaza dadgehkirina Rûsayê kir.Hemwextî vê Rûsya careke din gefên bikaranîna çekên nukleerî di şerê Ukrayna de dixwe. Serokê DYA Biden jî di vê mijarê de Putin hişyar kir.
Komara Çekya, ku serokê demkî yê Yekîtiya Ewropayê ye, daxwaz kir ku Rûsya ji ber êrişa li ser Ukrayna û kiryarên wê li dadgeha sûcên şer ya navneteweyî were dadgehkirin.
Ev bangawazî piştî dîtina gorên komî yên li bajarê Îzyum ê Ukraynayê ku cenazeyê bi sedan kesî têde bû pêk hat.
Gelek jin û zarok jî di nav gorên komî de hene.
Ukrayna dibêje ku heta niha termên 59 kesan ji gorên komî hatine derxistin û ew difikirin ku li devera daristanî ya bajêr gelek gorên din hene.
Wezîrê Karên Derve yê Çekya Jan Lîpavskî diyar kir ku ew alîgirê cezakirina hemû sûcdarên şer in û banga avakirina dadgeheke taybet a sûcên şer kir.
Gorên komî piştî ku leşkerên Ukraynayê li bakurê rojhilatê welêt êrîş kirin û hin deverên ji bin kontrola Rûsyayê derxistin, hatin dîtin.
Serokê Rûsyayê Vladimir Putin roja Înê got; Êrîşên dijber ên Ukraynayê dê bandorê li planên leşkerî yên Rûsyayê li rojhilatê welêt nekin.
Wezareta Parastinê ya Brîtanyayê diyar kir ku Moskow êrîşên xwe yên li ser binesaziya sivîl a Ukraynayê zêde kiriye.
Zelensky: Rûsya wê li qada şer û dadgehê hesab bide
Serokomarê Ukraynayê Volodymyr Zelensky ragihand ku wan delîlên nû yên êşkenceya li kesên di gorên komî yên li bajarê Îzyum de hatine veşartin dîtine.
Zelensky anî ziman ku wê Rûsya di qada şer û eywanên dadgehê de hesabê bide.
Seroka Komîsyona Ewropayê Ursula von der Leyen jî 15’ê Îlonê daxwaza dadgehkirina Putin ya li pêşberî Dadgeha Cezayê ya Navneteweyî kiribû.
Moskow hê jî derbarê gorên komî yên li Îzyumê hatine dîtin de daxuyanî nedaye.
Kremlîn berê kuştina sivîlan ji aliyê hêzên Rûsya ve red kiribû.
Biden, Pûtîn Hişyar kir: Li dijî Ukrayna nêzî bikaranîna çekên nukleerî nebe
Piştî hişyariyên Rûsyayê ku eger hêzên wê li Ukraynayê rastî zexteke zêdetir werin, wê bi tundî bersivê bide, serokê Amerîkayê Joe Biden, hempîşeyê xwe yê Rûsyayê Vladimir Putin li ser karanîna çekê nukleerî hişyar kir.
Putin hişyarî dabû ku eger hêzên wê bikevin bin zextek zêdetir, Moskov dê bersiveke tundtir bide.
Vê yekê jî fikara karanîna çekên nukleerî jî bi xwere dabû avakirin.
