Artêşa Rûsya ya li nava Ukrayna rojên zehmet derbas dike, daxwaza piştevaniyê ji Îranê dike.
Li dijî vê yekê ji Kîevê bertek derket.
Ukrayna bi hinceta ku Îran balafirên bêmirov daye Rûsya bertek nîşan da û jimara dîplomatên wê yên li nava welat kêm kir.
Îranê jî heman gav li dijî Ukraynayê avêt.
Serokomarê Ukrayna Zelensky jî dibêje;
Gefên Putin yên karanîna çekên nukleerî ne tenê gotine.
Şerê li Ukrayna di meha xwe ya 8’an de welatên dijber jî zêde kiriye.
Cezayên welatên rojavayî yên li dijî Rûsya, hêza wê ya di qada şer de kêm kiriye.
Wezareta Parastinê ya Amerîkayê (Pentagon) berî niha ragihandibû ku Îran wê hejmareke berçav ji dronan bişîne Rûsyayê.
Bi vê hincetê Kîevê bang li balyozê Îran yê li paytextê kir û xwet jimara dîplomatên li welat kêm bike.
Wezareta Karê Derva ya Ukraynayê li ser mijarê daxuyaniyek nivîskî weşand.
Wezaretê diyarkir ku wan ji ber rêveberiya Tehranê çek daye Rûsyayê bangî wezaretê kirine.
Di daxuyaniyê de bertek nîşanî şandina çekan a ji aliyê Îranê bo Rûsyayê hat dayîn û hat gotin;
Ev tevger derbeyek li têkiliyên Ukrayna-Îranê xistiye.
Piştî van gavên rêveberiya Kîevê, ji Tehranê jî heman helwest derket.
Berdevkê Wezareta Karê Derve ya Îranê Nasir Kenanî bi daxuyaniyeke nivîskî ragihand ku wan jî li dijî Ukrayna heman biryar girtine.
Kenanî dayîna alîkariya bo Rûsya bi awayekî eşkere red nekir û got, ew alîgirê rêya çareseriya navbera herdu welatan de ne.
Rûsya bi dronan êrişî bendera Odessa kir
Di vê navberê de êrîşa balafirên bêmirov ên Rûsyayê li ser Bendera Odessa bû sedema teqîneke tund û şewateke mezin.
Di daxuyaniya ku ji aliyê fermandariya baskê başûr ê artêşa Ukraynayê ve hat dayîn de hat ragihandin ku êrîşa balafirên bêmirov ên Rûsyayê li navenda leşkerî hatiye hedefgirtin û di encamê de cebilxaneya li wir hatiye teqandin.
Li aliyekî din di çarçoveya seferberiya ku Serokê Rûsya Vladimir Putin 21’ê Îlonê ragihandî de, leşkerên hatine gazîkirin, gihiştin çeperan.
Lê hemwextî vê yekê, reva ji nava welat jî zêde dibe.
Zelensky: Gefên Putin yên nukleerî ne tenê gotin e
Hemwextî vê yekê Serokomarê Ukrayna Volodymyr Zelensky gefên karanîna çekên nukleerî yên Putin cidî digre.
Zelensky di axaftina xwe ya bo televsiona CBS ya Amerîka axivî û got:
Ez nafkirim ku Putin di mijara karanîna çekên nukleerî de tenê weke gotin axivî ye.
Amerîka jî di her fersendê de dibêje, karanîna çekên nukleerî wê berdêlek xwe ya giran hebe.
Piştî Koşka Spî, Wezîrê Karê Derve yê Amerîka Antony Blinken jî careke din anî ziman ku wê encamên giran yê karanîna çekên nukleerî hebe.
