Li Îranê…Jimara xwepêşandêrên hatine kuştin gihişt 57’an

Serhildana jibo Jîna Emînî hatî despêkirin, li welat belav dibe.
Heta niha 57 xwepêşandêr hatine kuştin.
Di xwepêşandanên li 146 bajar û navçeyan de, 8 hezar kes hatine binçavkirin.
YE jî bo rejîma Îranê got,
Li Îranê jî wek her derê mafê xelkê heye ku xwepêşandanên aştiyane pêk bînin.

Ev der qada serhildana jinê ya li dijî rejîma Îranê ye.

Şevê din careke din xwepêşandêr li Îran û Rojhilatê Kurdistanê li dijî qetilkirina Jîna Emînî li qadan bûn.

Doh di şeva dehan de, li bajarê Sine, Urmiye, Bokan û gelek bajarên din xelkê rojhilatê Kurdistanê li qadan bûn.

Li qadan dîsa dirûşmeya ‘Jin jiyan azadî’ bilind dibû.

Bi heman awayî li bajarên Tahran, Esfehan, Buşehr, Zahîdan, Terbîz, Şêraz, Lahîcan û gelek bajarên din jî xwepêşandan dewam kirin.

Hêzên leşkerî yên Îranê êrişî xwepêşanderan kirin.

Rêxistina Mafên Mirovan a Îranê (ÎHH) ku navenda wê li Osloyê ye, diyar kir ku herî kêm 57 çalakvan jiyana xwe ji dest dane.

Di xwepêşandanên li 146 bajaran de 8 hezar kes hatine binçavkirin

Çavkaniyên dijber dibêjin ku xwepêşandan herî kêm li 146 bajaran, li 31 eyaletan belav bûne.

Çavkaniyên nêzîkî rêxistina Mucahidînên Gel a muxalifên Îranê diyar kirin ku li 146 bajaran herî kêm 8 hezar kes hatine binçavkirin.

Jimara kesên jiyana xwe ji dest dane jî 180 derbas kiriye.

Li gorî daxuyaniya fermî di 10 rojan de 41 kesan jiyana xwe ji dest dane.

Rejîma Îranê bi şertek cenazeyan radestî malbatan dikin, ew jî divê taziye neyê dayîn.

Komîteya Parastina Rojnamevanan (CPJ) ku navenda wê li Amerîkayê ye, diyar kir ku 17 rojnamevan hatine destgîrkirin.

Ji bilî binçavkirinan, rejîma Îran hewl dide bi rêya qutkirina xetên înternetê û telefonên malan dengê xwepêşandana qut bike.

Kompanyayên înternetê yên li Îranê duh bi şev li seranserê Îranê xetên înternetê qutkir.

YE: Mîna her cihî li Îranê jî mafê xwepêşandanên aştiyane heye

Di vê navberê de, ji Yekîtiya Ewropa jî hişyariyek bo rejîma Îranê hate kirin.

Nûnerê Bilind ê Têkiliyên Derve û Polîtîkayên Ewlekariyê yê Yekîtiya Ewropayê Josep Borrell derbarê xwepêşandanên li Îranê de daxuyaniyeke nivîskî da.

Josep Borrell xwest tundiya li dijî xwepêşanderên Îranê bi dawî bibe û înterneta hatî qutkirin bê rakirin.

Borrell got;

“Li Îranê weke li her dera din mafê mirovan heye ku bi aştiyane xwepêşandanan bikin.”

Back to top button