Ji destpêkirina êrişa li dijî Ukraynayê, care pêşî artêşa Rûs ew çendî dikeve nava rewşeke xerab.
Fermana vekişîna ji herêma Xersonê nîşaneya vê yekê ye.
Di vê navberê de Amerîka îdîa kir ku ji destpêka şer ve 100 hezar kuştî û birîndarên artêşa Rûs çêbûne.
NATO jî dibêje, ya tê xuyakirin Rûsya paşde tê dehfdan.
Doh ji nişkê ve Wezîrê Parastinê yê Rûsyayê Sergei Shoigu ferman da hêzên xwe ku ji derdora herêma Xersonê vekişin.
Shoigu di daxuyaniya xwe de ragihand ku ew ê hêzên xwe ji aliyê Çemê Dnîpor vekişînin û got;
Armanc ji vê gavê parastina hêzên Rûsyayê ye.
Fermandarê hêzên Rûs li Ukraynayê General Sergey Surovikin jî biryara vekişînê piştrast kir û got:
“Di rewşa heyî de bicihanîna pêwîstiyên lojîstîkî pir zor e.
Heta niha 115 hezar kes ji bajêr veqetiyan e. Êdî bicihanîna pêwîstiyên jiyanî ne pêkane.
Ji ber vê, hem ji bo çareserkirina vê mesele û hem jî ji bo parastina leşkerên xwe, vekişîn biryareke di cih de ye.
Her çendî aliyê Rûs xwe dispêre van îdîayan jî lê vekişîna ji derdora Xersonê weke têkçûneke mezin tê binavkirin.
Lewma beriya demekê Putîn Xerson weke beşeke ji xaka welatê xwe ragihandibû.”
Ukrayna ji vekişîna Xersonê bi fikar e
Tevî vê biryara Rûsyayê jî Ukrayna bifikar e.
Rêveberiya Kievê ragihand ku fermana vekişînê gaveke tektîkî ye û got, ev yek nayê watey derketina bi temamî ji bajarê Xersonê.
Şêwermendê serokê Ukraynayê Mikhailo Podolyak got,
Heta ala welatê me li her devera Xersonê neyê hildan, em ê nikaribin behsa vekişîna hêzên Rûs bikin.
Amerîka: 100 Hezar kuştî û birîndarên Rûsyayê hene
Di vê navberê de Amerîka îdîa kir ku di nava 8 mehên derbasbûyî de derbên giran li artêşa Rûsyayê hatine xistin.
Serok-erkanê Amerîkatê General Mark Millie ragihand ku ji destpêka şer ve 100 hezar kuştî û birîndarên Rûsyayê çêbûne.
Generalê Amerîkî diyar kir ku aliyê Ukraynayî jî di heman astê de kuştî û birîndar dane.
Stoltenberg: Tişta em dizanin Rûsya paşde tê dehfdan
Li ser mijarê daxuyaniyek jî ji Londonê hat.
Sekreterê Giştî yê NATO’yê Jens Stoltenberg piştî hevdîtina xwe ya li gel Serokwezîrê Îngilîstanê Rishi Sunak, li ber avahiya Serokwezîrtiyê daxuyanî da rojnamevanan.
Stoltenberg diyar kir ku divê piştgiriya ji bo Ukraynayê bidome û got,
“Eger Putin li Ukraynayê bi ser bikeve, wê ji bo Ukraniyan bibe felaket. Ev yek wê me jî zêdetir mexdûr bike.”
