Li navçeyên Elbistan û Nûrheqê xebatên lêgerîn û rizgarkirinê cihê xwe ji rakirina xirbeyan re hiştiye.
Li van her du navçeyan hema bêje hemû avahiyan xesar dîtine.
Xelkê van herêman ji bo stargehekê ji herêmê derketine.
Erdhejên ku navenda wê navçeyên Bazarcix û Elbîstan ên Mereşê bûn li 10 bajaran rê li ber karesatek mezin vekir.
Erdheja duyemîn navenda wê navçeya Elbistanê bû û hema bêje ji sedî 70’ê navçeyê hilweşiya ye.
Li Elbistanê heta niha 565 avahî ketine ber qeydê ku bi lezgînî werin hilweşandin.
Hê jî li hin avahiyan xebata xirbeyan nehatiye kirin.
69 gund û taxên navçeyê hene. Beşek mezin ji van tax û gundan xesar dîtine.
Li 40 jîngehan mirov nikarin bikevin mala xwe.
Xelkê navçeyê koç kirine û hema bêje kes li navçeyê nemaye.
Li navçeyê pirsgirêkên cihbûn, tenduristî, germbûn û serşokê dewam dikin.
Konên hatine vedan jî pêdiviyên xelkê bicih neanîne.
Gelek zarok û welatî nexweş dikevin.
Di rojên despêkê de li gelek deveran bi destê rêxistinên sivîl xwarin ji bo welatiyan dihat belavkirin.
Lê bi derbasbûna demê re ev yek jî rabû û hîna jî birînên mexdûran nehatine pêçandin.
Ji sedî 70’ê avahî hilweşiyan e
Li navçeyê ji sedî 70’ê avahiyan hilweşiyane û ji sedî 30’yê avahiyan jî xesar dîtine.
Rojek piştî erdhejê tenê li çend avahiya xebatên lêgerîn û rizgarkirinê hatin kirin.
Cenaze piştî rojan hatin veşartin
Li navenda navçeyê rewş wiha ye.
Li gundan jî ji roja despêkê ve adeta dramek heye.
Li gundên Elbistanê heta niha ji 200 kesî zêdetir mirov jiyana xwe ji dest dane.
Xelkê gundan bi destê xwe sax û miriyên xwe ji bin xirbeyan derxistin û çend roj şûnve veşartin.
Mexdûrên erdhejê destnîşan dikin ku gelek kes li Elbistanê û gundên wê di encama xemsariyê de mirine.
Erdhejê bandoreke neyînî li ser navçeya Nûrheqê jî kir.
Li gorî daneyên nefermî, ji 200 kesî zêdetir mirov jiyana xwe ji dest dan.
Ji ber kêmaniya makîneyên kar cenazeyên ji bin xirbeyên navçeyê û gundan hatin derxistin, demek dirêj nehatin veşartin.
Heta niha jî têkildarî rûxandina li navçeyê û gundan tu daneyek fermî nehatiye eşkerekirin.
Hê jî rakirina xirbeyan û hilweşandina avahiyên xesar dîtine nehatiye destpêkirin.
Nayê zanîn ku gelo derbarê avahiyan de lêkolînek hatiye kirin an na.
Li navçeya Afşînê ya Mereşê jî 397 avahî ji ber erdhejê hilweşiyan.
Li navçeya Goksûnê jî ji 100 zêdetir avahî hilweşiyan e.
