Çavdêriya Sûrî SOHR ragihand ku di erdheja li Sûriyê de heta niha 5 hezar û 651 kesî jiyana xwe ji dest dan. Ne rê hatiye vekirin ku alîkarî bigheje mexduran û alîkariya gihiştiye jî ji aliyê çeteyan ve hatiye destserkirin.
Erdheja ku navenda wê Bakurê Kurdistanê bû li gelek bajarên Sûriyê jî zirar çêkir..
Li ser erdhejê re 10 roj derbas bûn.
Herî zêde erdhejê bandor li Idlib, Heleb, Hema, lazqiyê û Tartus û Cindirêsa Efrînê kir.
Li van parêzgehên navborî, ji ber erdhejê, malwêraniyek mezin rû da..
Bi hezaran kesî jiyana xwe ji dest dan, birîndar bûn û bê cih û war man..
Xebatên tîmên lêgerînê li herêmên hilweşiyayî bi hemû derfetên xwe dewam dikin.
Hîna jî bi sedan kes di bin kavilan de ne û her roj amarên nû der barê qurbaniyên erdhejê de tên qeydkirin.
Çavdêriya Mafên Mirovan a Sûriyê ragihand ku di erdheja li Sûriyê de 5 hezar û 651 kesî jiyana xwe ji dest da.
Çavdêriyê diyar kir ku ji wan 2 hezar û 200 kes li herêmên hikûmetê û 3 hezar û 451 kes jî li herêmên dagirkirî ne..
Hezar û 702 welatiyên sûrî jî li bakurê Kurdistanê di encama erdhejê de jiyana xwe ji dest dane.
Çete nahêlin mexdûrên erdhejê derbasî herêmên Rêveberiya Xweser bibin
Çavdêriya Sûrî her wiha ragihand ku komên çete, rê li gelek malbatên ku malên wan wêran bûne û xwestine derbasî herêmên rêveberiya xweser bibin girtine.
kesên dixwazin bi qaçaxî jî derbas bibin, ji 200 heta hezar doldarî pere ji wan tê girtin.
Alîkariyên ku ji bo mexdurên erhejê jî hatine şandin, ji aliyê çeteyan ve hatine desteserkirin û li muhtacan nehatine belavkirin.
Welatiyên Kurd ên ji navçeya Cindirêsê ya Efrîna dagirkirî dibêjin tu alîkarî negihaştine wan û alîkarî tenê diçin ji biyaniyan re.
Rêveberiya Xweser a Bakur û Rojhilatê Sûriyê ji roja destpêkê ve alîkarî şand herêmên zirar dîtî, lê rê nehat dayîn ku derbas bibe..
