Komîteya Gel û Baweriyan a KCK’ê Cejna Remezanê pîroz kir û xwest bibe wesîleya azadî, edalet û wekheviyê.
KCK bang li gelên Rojhilata Navîn û baweriyan hemûyan kir, li dijî dijminê civakê û bazirganên olî têkoşîneke hevpar bimeşînin.
Bi wesîleya Cejna Remezanê Komîteya Gel û Baweriyan a KCK’ê daxuyaniyek weşand.
KCK’ê Cejna Remezanê li hemû Misilmanan pîroz kir û xwest bibe wesîleya azadî, edalet û wekheviyê
“Weke gelê Kurdistanê em cejnê di nava pêvajoyeke giran de pêşwazî dikin.
Erdhej ji felaketa xwezayî wêdetir ji aliyê desthilatdariya AKP-MHP’ê ve veguherî amûreke qirkirinê.
Ji ber ku tedbîrên pêwîst nehatin wergirtin li ser gelê me bû felaketeke mezin.”
KCK’ê bi bîr xist hikumeta AKP-MHP’ê bû sedem zêdeyî 100 hezar mirovên me jiyana xwe ji dest bidin û got:
“Ev qeder nîne, ev komkujiyeke ku bi zanebûn hatiye kirin.
Gelê me wê hesab ji van kujerên gelên me û bazirganên olê bipirse.”
Di daxuyaniya xwe de KCK bal kişand ser derfetên hilbijartinên li Tirkiyê yê ji bo têkoşînê û ev yek got:
“Di serî de ji bo gelê Kurd, ji bo hemû gel, bawerî, jin û ciwanên li Tirkiyê, firsendeke mezin hatiye afirandin.
Bi taybetî ji bo gelê Kurd ê ku êrîşên qirkirinê lê tên kirin, bi hilbijartinên vê biharê re wê pêvajoyeke ji bûyerên mezin rû bide.
Ji bo ev yek pêk were, divê mirov hîn bêhtir bixebitin, bi rêxistin bikin û bi rêbaza seferberiyê tevlî pêvajoyê bibin.”
KCK destnîşan kir têkoşîna ku Tevgera Azadiyê ya Kurdistanê, desthilatdariya faşîst xistiye nava pêvajoya hilweşînê û got:
“Gelê Kurd bi biryar e ku bi hilbijartinê re vê pêvajoyê bibe serî.”
Di dewamê de KCK’ê diyar kir divê serdana malbatên me yên girtiyan û piştevaniya bi wan re bê kirin û ev tişt anî ziman:
“Di vê cejnê de divê em hîn bêhtir xwedî li şehîdên xwe derkevin û bi girseyî serdana şehîdgehan bikin.
Divê malbatên me yên şehîdan bi tenê neyên hiştin, cejna hev pîroz bikin û serdana hev bikin.
Weke tevgerê bi wesîleya cejnê em li pêşberî bîranîna şehîdên xwe bi rêzdarî û minetdarî bejna xwe ditewînin û soz didin ku têkoşîna wan heta serketinê mezin bikin.”
Komîteya Gel û Baweriyan a KCK’ê di dawiyê de bang li gelên Rojhilata Navîn kir ku li dijî dijminê civakê û bazirganên olî têkoşîneke hevpar bimeşînin
