Şerê li Sûdanê di roja xwe ya 6’an de dewam dike.
Agirbesta 24 satan bo cara 2’emîn tê binpêkirin.
Jimara qurbaniyên şer jî bilind dibe û pêleke mezin a koçkirinê li Xartûma paytext tê dîtin.
Tevî erêkirina agirbestê ji hêla herdu aliyên şerê li Sûdanê ve, asta şer li vî welatê xizan kêm nebûye.
Hêzên Piştevaniya Lezgîn: Me 2 helîkopterên artêşê anîn xwarê
Di roja 6’an de, şer di navbera Artêşa Sûdanî û Hêzên Piştevaniya Lezgîn de, li Xartûma paytext, li derdora Fermandariya Giştî ya Artêşê derket û dengê çend teqînan hat bihîstin.
Agahiyên meydanî yên ji Sûdanê hatine girtin wiha ne:
- Derdora avahiya Fermandariya Giştî ya Artêşê, her wiha balafirgeha Xartûmê hat topbarankirin.
- Li Um Dirman û li derdora balafirgeha Merwî pevçûn hebûn.
- Li Um Dirman Hêzên Piştevaniya Lezgîn bi fûzeyên dij-zemînî bersiv da balefira cenkî yên Artêşê.
Hêzên Piştevaniya Lezgîn di daxuyaniya xwe ya vê sibehê de got:
“Tevî agirbesta ku şevê din hat ragihandin, hêzên darbekar vê sibehê êrîşî hêzên me yên li rojhilatî Um Dirman kir, lê hêzên me berseva êrîşan da û ziyaneke mezin gihand darbekaran û 2 helîkopterên wan anîn xwar.”
Rêxistina Tenduristiyê ya Cîhanî: 330 kes di şerê Sûdanê de hatine kuştin
Li gorî daneyên Rêxistina Tenduristiyê ya Cîhanî, heta niha 330 kes di şerê li Sûdanê de hatine kuştin.
Rêxistinê banga rawestandina şer û rêdanan derbasbûna tîmên mirovî û gihandina alîkariyên bijîşkî kir.
Waşington banga diyaloga yekser li herdu aliyên şer dike
Waşingtonê jî şerê li Sûdanê şermezar kir û banga diyaloga yekser li herdu aliyên şer kir.
Berdevka Koşka Spî Karine Jean-Pierre diyar kir, mezintirîn berpirsên Amerîkî di nava pêwendiyeke yekser di gel herdu aliyên şerê li Sûdanê de ne.
Li Xartûma paytext pêleke mezin a koçkirinê heye
Ji ber gurbûna şer, Qutbûna av, alekitrîkê û barîna fîşekan, welatiyên Xartûma paytext neçarî koçkirinê dikin.
Li gorî çavkaniyan, li Xartûmê pêleke mezin a koçkirinê, ber bi bajarên aram ve heye.
Artêşa Misirê: Nifşekî leşkerên me bi 3 balafiran ji Sûdanê hatin derxistin
Li aliyê din, Artêşa Misirê îro Pêncşemê ragihand, leşkerên Misirî yên li Sûdanê asê mabûn, duh bi 3 balafiran gihîştin Qahîrayê.
Li gorî daxuyaniya Artêşa Misirê, bi navbeynkariya Xaça Sor a Navdewletî, leşkerne din ên Misirî yên li Sûdanê, gihîştine balyozxaneya Misirê ya li Xartûmê.
Hêzên Piştevaniya Lezgîn jî vê sibehê ragihandibû, wan 27 leşkerên Misirê radestî Xaça Sor a Navdewletî kirine.
