Li gelek deverên cihanê barîna barana dijwar bi dawî nabe.
Slovenya, Awistury û Xirwatîstan ji hefteya borî ve di nav felaketa lehiyê de mane.
Li Slovenyayê 6 kes mirin, bi qandî 500 milyon euro zirara malî çêbû.
Li Xirwatîstanê jî bi dijwariya baranê re li gelek bajaran rewşa awarte hat ragihandin.
Slovenya, Awisturya û Xirwatîstan ji hefteya borî ve ji ber bahoza dijwar, barana zêde, lehî û şimitîna axê rojên dijwar derbas dikin.
Barana dijwar a ku bê navber dibare li Slovenyayê rê li felaketan vekriye.
Li welêt herêmên ku çemên Save, Drau û Mur derbas dibin hê jî di bin avê de ne.
Li bajarên Murska Sobota û Slovenj Gradec jî rewşeke awarte heye.
Ji ber barana ku ji roja Îna borî ve dest pêkiribû bendava çemê Mur hilweşiya û li gelek cihan şimitîna erdê pêk hat.
Bi vê yekê re gelek rê ji çûn û hatinê re hatin girtin.
Ji ber barana zêde li Slovenya 6 kes mirin
Rayedaran diyar kirin ku ji ber lehiyê û hewaya xerab heta niha 6 kes mirine.
Ji wan du welatiyên Hollandî yên dema hildikişiyan çiyayê nêzî bajarê Kranj birûskê li wan da.
Di encamê de herdu kesan jiyana xwe ji dest dan.
Slovenya ji NATO û ye alîkarî xwest
Serokwezîrê Slovenyayê Robert Golob diyar kir ji ber lehî, bahoza û şimitîna axê bêtirî 500 milyon euro zirara madî gihiştiye welêt.
Hikûmetê ji ber karesata lehiyê ji NATO û Yekîtiya Ewropayê (YE) alîkariyê xwest.
Li Awisturya baran kêm dibe, lê şimitîna erdê dewame
Li aliyê din li Awisturya yê bandora baranê li gorî rojên destpêkê kêmtir dibe.
Li herêma nêzî sînorê Awûstûrya yê bi kêmbûna baranê re bandora çemê Murê kêm bû.
Du santralên hîdroelektrîkê yên li çemê Saveyê ku ji ber zêdebûna çem hatibûn rawestandin, ji îro pê ve dîsa dest bi xebatê kirin.
Lê belê hat diyarkirin ku xeteriya şimitîna axê dewam dike.
Li Karntenê ji ber şimitîna axê, gelek welatî li hin cihan neçar man ji malên xwe derkevin.
Li Xirwatîstana rewşa awarte hate ragihandin
Li Xirwatîstana cîran, îro asta avê li çemên Save, Drau û Murê bilind bû.
Ji ber lehiya zêde gelek kolan û zevî di bin avê de man.
Bi dijwariya baranê re li bajarên Rugvica, Botovo, Mursko Sredisce û Gorican rewşa awarte hat ragihandin.
