Milîsên Dîaf Wetenî êrişî endamên qebîleyê kir û di encamê de 4 endamên qebîleyê birîndar bûn.
Şêwirmendê qebîleyê Ekrem Mehşûş diyar kir ku danûstendinên bi hikûmeta Şamê re der barê rakirina Dîfa Wetenî têk çûn û êdî rê li ber her tiştî vekirî ye.
Êlên Kurd û Ereb ên herêmê piştgiriya xwe bo qebîleya Cibûr nîşan da.
Yekşema borî milîsên Dîfa El Wetenî yên hikûmeta Şamê li hemberî yek ji rûspiyên êla Cibûr êrîşek pêk anî.
Ji wê rojê û heta niha di navbera qebîleya Cibûr û milîsên Dîfa Wetenî de, li çargoşeya ewlehiyê ya li bajarê Hesekê alozî heye.
Qebîleyê 2 caran muhlet da hikumeta Şamê ku daxwazên wê bînin cih û milîsên Dîfa Wetenî ji hev bixin û serçeteyê wê li Şamê darizînin.
Hikûmeta Şamê bersiva daxwazên qebîleya Cibûr neda.
ji ber vê yekê, şevê din di navbera her du aliyan de bi çekên sivik şer derket.
Her wiha konê qebîleyê jî ku li taxa Til Hecer ji duşemê ve hatiye vedan, hat hedefgirtin.
Di encamê de 4 endamên qebîleya Cibûr û çekdarekî dîfa wetenî birîndar bûn.
Her wiha doh êvarî rûspiyekî qebîleyê ragihand, wan careke din dem daye hikumeta Şamê ku heta îro çeteyên Dîfa Wetenî ji hev bixe.
Îro çend rûspiyên Cibûr bi Parêzgarê Hesekê Lwey Seyûh civiyan.
Şêwirmendê qebîleya El Cibûr Ekrem Mehşoş bi riya telefonê bi ajansa ANHA’re li ser hevdîtinê axivî û wiha got:
“Hemû dan û standinên bi berpirsên hikumeta Şamê re ji bo rakirina Dîfa El Wetenî bi bin ketin.
Êdî derî li ber her îhtîmalekê vekirî ne.”
Êlên Ereban û Kurd piştgiriya êla El Cibûr kirin
Êlên Ereb û kurd ên herêmên bakur û rojhilatê Sûriyê piştgiya xwe da qebîleya Cibûr.
Şandeyek ji qebîleya Begara û nûnerên êla El Cibûr li Reqa û Minbicê ji bo piştgiya êla cibûr gihaştin Hesekê.
Piştî pêşwazîkirinê, şêx Kamil El Muxtar ê ji eşîra El Hemdon El Keze ya girêdayî êla El Cibûr û nûnerê êla El Cibûr li Minbicê axivî û wiha got:
Em li kêleka apên xwe yên qebîleya El Cibûr in,
Ji ber ku rûmeta Ebdulezîz El Mislit rûmeta her Cibûriyekî ye.”
Her wiha Şêx Mihemed El Hemîd El Beşîr jî li ser navê qebîleya Begara piştgiriya xwe ji qebîleya El Cibûr re anî ziman û wiha got:
“Em hatin da em peyamekê bidin ku em hemû welatiyên qebîle û eşîran in, ji Dera heta bi Dêrazorê çarenûs û rûmeta me yek e.”
Meclisa Eşîrên Kurd li Cizîrê bi daxuyaniyekê sûcê li dijî rûspiyekî êla El Cibûr şermezar kir û wiha hat got:
“Em piştgiriyê didin aqilmendên El Cibûr, bi taybet El Mulhim ku hişyar bin û ji van rageşiyan bi dûr bikevin.
Em Meclisa Eşîrên Kurdan a Cizîra Sûriyeyê amade ne erka xwe pêk bînin ku maf li xwediyan vegere.”
https://youtu.be/vMjiTR111M0
