Desteya Rûspiyên Bakur û Rojhilatê Sûriyê bi daxuyaniyekê piştgiriya xwe bi operesyona Xurtkirina Ewlehiyê re ragihand.
Rûspiyên herêmê jî destnîşan kirin ku ewê bi tundî li hember kesên ku dixwazin fitneyan derxin disekinin.
Desteya Rûspiyên Bakur û Rojhilatê Sûriyê derbarê Operesyona “Xurtkirina Ewelehiyê” li Bajarê Qamişlo daxuyaniyek da û piştgiriya xwe bi operesyonê re anîn ziman.
Desteya Rûspiyan bang li tevahî êl û pêkhateyên herêmê kir ku yek dest bin, piştgiriya hev di vê dema hesteyar de bikin û got:
Divê gelê me gav bi gav li rex hêzên xwe bisekine ku niha dest bi operesyona “Xurtkirina Ewlehiyê” kirine,
Da ku ewlehiya herêmên me misoger bikin û ji şane û bermahiyê DAIŞ’ê paqij bikin.
Desteya Rûspiyan gelê herêmê hişar kir bi fitneyan neyên xapandin, ji ber armanca kesên fitnê derdixin têkbirina aramiya li herêmê ye.
Şêx û rûspiyên herêmê piştgiriya xwe bi operesyonê re ragihandin
Her wiha şêx û rûspiyên êl û qebîleyên Ereb jî derbarê operesyonê ji kenala mere axivîn.
Macid El Erak şêxê qebîleya El Sada El Eşraf axivî û diyar kir ku ew û tevahî ferdên qebîleyê piştgiriya QSD’ê dikin û got:
“Em piştgiriya vê operesyonê dikin, şaneyên DAIŞ’ê û kesên ku hişbirê belav dikin hewl didin aramiya li herêmê têk bibin.
Hesen El-Hesen ji qebîleya El-Begara jî operesyon nirxand û ev titş anî ziman:
“Gelek alî hene dixwazin projeya netewa demokratîk a ku li herêmê pêk hatiye ji wateya wê derxin, em bi tundî li dijî van aliyan disekin.
Em hemû yek dest, hêz û rêveberî ne û tu kes nikare destketiyên ku bi xwîna şehîdan hatine bidestxistin têk bibe.
Her wiha Serokê Desteya Rûspiyên Hesekê Ekrem Mehşûş jî da zanîn ku di vê demê de, divê em hemû li rex hev bisekinin û piştgiriya hêzên xwe bikin.
https://youtu.be/Fr9k2ypuwvA?si=oxUyBeva8rbb5Imt
