Serokê Hikumeta Şamê Beşar Esed ji 2004’an ve, yekem serdana xwe ya fermî ya bo Çînê pêk anî.
Beşar Esed yê ji bo rawabûna xwe ketiye tevgerê, hewil dide bi van serdanan deshilata xwe mîsoger bike.
Çîn jî îdia dike ku ev serdan wê têkliyan bigihîne astekî nû.
Serokê Hikumeta Şamê Beşar Esed piştî 20 salan ji bo yekem serdana xwe ya fermî li Çînê ye.
Esad ku piştî şerê navxweyî yê li Sûriyê 2011’an dest pê kir, ji xeynî welatên Rojhilata Navîn dernediket.
Niha ji bo merasîma vekirina Lîstikên Asyayê yên 19’emîn çû Hangzhouyê.
Televîzyona giştî ya Çînê CCTV ragihand ku Esed û serkirdeyên din ên biyanî dê li Hangzhou bi Serokê Çînê Xi Jinping re bicivin.
Tê plankirin ku Xi roja Îniyê serdana Hangzhou bike.
Berpirsekî hikumeta Şamê ji ajansa Reutersê re, diyar kir ku Esed û Xi wê Înê bicivin.
Piştî vekirina Lîstikên Asyayî ya li Hangzhou wê roja Yekşemê û Duşemê jî peywendiyên xwe yên li gel rêveberên Pekînê bidomîne.
Esed di sala 2004’an de serdana xwe ya yekem û dawî ya fermî bo Çînê kiribû.
Wezareta Karê Derve ya Çînê: Serdan wê têkiliyan bigihîne astek nû
Di daxuyanîya ku ji aliyê Wezareta Karê Derve ya Çînê ve hat dayîn de hat diyarkirin ku seredana Esad wê têkiliyên di navbera her du welatan de bigihîne asteke nû û wiha hat gotin:
“Dostaniya Çîn û Sûriyê ya kevneşop û kûr heye.
Serdana Esed wê pêbaweriya siyasî ya dualî û têkiliyên di navbera her du welatan de xurt bike.”
Berdevka Wezaretê Mao Ning bi bîr xist ku Sûriye di nav welatên yekem ên cîhana erebî de bû ku bi Çînê re têkiliyên dîplomatîk danî û ev tişt got:
“Pêwendiyên Çîn-Sûriyê ji destpêka avakirina têkiliyên dîplomatîk ên beriya 67 salan ve pêşketineke saxlem û bi îstîkrar nîşan dide.”
Mao Ning daxuyakirin ku Xi û karbidestên din ên Çînê wê bi Esed re bicivin da ku nêrînên kûr li ser têkiliyên dualî û mijarên berjewendiya hevbeş biguhezînin.
Çîn ku yek ji pênc endamên daîmî yên Konseya Ewlekariyê ya Neteweyên Yekbûyî (KENY) xwedî mafê vetoyê ye, herî kêm 8 hewildanên derbaskirina biryarên li dijî Esed di konseyê de asteng kiribû.
Ji bilî Çînê, Rûsya ku piştgirê herî girîng ê Esed e, di konseyê de xwedî mafê vetoyê ye.
