Rêveberiya Xweser, PYD’ê û saziyên herêmê êrişên dewleta Tirk a dagirker şermezarkirin.
Bang li gelên herêmê hate kirin ku li ber êrişên li ser rûmeta xwe rabin û bang li civata navnetewî û saziyên mafên mirovan jî hate kirin û helwestê nîşan bidin.
Li dijî êrişên dewleta Tirk a dagirker Rêveberiya Xweser, PYD’ê û saziyên herêmê bertekên tund nîşandan û êriş şermezarkirin.
Rêveberiya Xweser ya Bakur û Rojhilatê Sûriyê daxyaniyekê diyar kir êrişên dewleta Tirk hemû qanûn û pîvanên navnetewî binpê dike û wiha got,
“Dewleta Tirk her gava ku têk diçe êrişî herêmên me dike.
Ev êriş û gefên li dijî herêmên me bandoreke neyênî li têkoşîna gelê me û Koalîsyona Navneteweyî yên li dijî DAIŞ′ê û şaneyên wê dike.
Rêveberiya Xweser: Gelên herêmê wê xwedî li destketiyên xwe derkevin
Hedefgirtina avahiyên xizmetguzariyê dê bandorên neyênî li ser rewşa debarê ya jiyanî bike û ev yek sûce şer e.”
Rêveberiya Xweser bang li gelên herêmê kir ku hevgirtina xwe xurtir bikin û destkeftiyên şehîdan biparêzin.
“Dewleta Tirk di êrişên xwe de welatiyên sivîl hedef digire”
Rêxistina Mafên Mirovan a Herêma Cizîrê destnîşan kir ku dewleta Tirk bi van êrişan hewl dide krîza xwe ya hundirîn derbasî hundirê Sûriyê bike.
Rêxistinê bêdengî û bêhelwestiya hêzên navneteweyî rexne kir û bang li wan kir ku helwestê nîşan bidin.
TEV-DEM: Divê sînorek ji êrişên dewleta Tirk re bê danîn
Tevgera Civaka Demokratîk TEV-DEM’ê jî bi daxuyaniyekê da zanîn ku dewleta Tirk bi hemû rêbazên qirêj hewl dide aramî û ewlehiya herêmê têk bibe.
TEV-DEM bang li aliyê peywendîdar kir ku sînorekî ji êriş û binpêkirinên dewleta Tirk re deynin.
Foza Yûsif: Divê herkes li ber êrişan rabe û rûmeta xwe biparêze
Endama Desteya Hevserokatiyê ya PYD’ê Foza Yûsif jî diyar kir ku aramanca êrişan valakirina herêmê ye.
Foza Yûsif bertek nîşanî bêdengiya hikûmeta Şamê li dijî êrişan da û got:
“Bêdengiya li hemberî êrişên li ser xaka Suriyê û welatiyên wê cihê şermê ye, ji berpirsyariyê dûr e.”
Foza Yûsif bang li gel kir ku li ber van êrişên li ser xak û rûmeta xwe rabin û helwesteke tund nîşan bidin.
Salih Muslim: Êriş di encama plana tunekirina Kurdan de tên kirin
Hevserokê Giştî yê PYD’ê Salih Muslim jî diyar kir êriş di encama plana tunekirina gelê Kurd de tên kirin û got,
“Êrîşên dewleta Tirk ên dijî Kurdan bênavber didomin.
Lê tu carî biserneketin û nikarin Kurdan tine bikin.”
Salih Muslim bêdengiya cîhanê ya li hemberî êrîşan weke rûreşiyek pênaser kir û diyar kir ew ê heta dawiyê li dijî êrişan bisekinin û wê berxwedana gelên herêmê bi ser bikeve.
