Ji parêzerên Buroya Hiqûqê ya Sedsalê Rêzan Sarica diyar kir ku zexteke fîzîkî, civakî, psîkolojîk, derûnî û fikrî li Rêber Abdullah Ocalan tê kirin, bi vê yekê dixwazin ku ji aliyê fîzîkî, ruhî û fikrî ve wî lawaz bikin û got, nêzî 25 sal in hewl didin wî teslîm bigirin, lê nekarîne vê bikin.
Ji parêzerên Buroya Hiqûqê ya Sedsalê Rêzan Sarica têkildarî tecrîda li dijî Rêber APO ji ANF’ê re axivî
Rêzan Sarica bi bîr xist ku dewletê cezayê girtina heta bi hetayê yê girankirî li şûna cezayê darvekirinê bi cih kir, lê belê ev yek jî têr nedît û got:
“Polîtîkayeke welê dimeşîne ku hewl dide her kêlî, her deqeya girtinê bike kêliya zilm û zordariyê.
Desteya Dîsîplînê, Desteya Îdare û Çavdêriyê, Dozgerî û Dadgeriya Înfazê bi rê û rêbazên cuda ceza ferz kirine.
“Di nava 12 salan de tenê 5 caran parêzeran karîbûn hevdîtinê bikin”
Sarica bi bîr xist ku serdanên malbatê û parêzeran heta sala 2011’an bi biryarên pratîkî û neqanûnî hatin astengkirin, ti carî destûr nehate dayin ku serdan bi rêk û pêk bêne kirin û got:
“Ji sala 2011’an û pê ve jî di nava 12 salan de ji bilî 5 hevdîtinên parêzeran destûr nehate dayin ku parêzer karibin hevdîtinê bikin.
Bi hinceta cezayên dîsîplînê jî di nava 9 salên dawî de malbatê tenê 5 caran karîbû hevdîtinê bike.
Cezayên dîsîplînê lê hatin birîn ku axaftina bi telefonê û şandina nameyan lê asteng kirin.
Lê belê nameyên ji gef û heqaretê dan wî ku bixwîne.
Pirtûk û kovarên ku sîstem qebûl nake, nehatin dayin.
Pirtûkên ji metnên ku birêz Abdullah Ocalan pêşkêşî doza Dadgeha Mafên Mirovan a Ewropayê (DMME) kiribûn, bi qedexeya desteya çavdêriyê ji wî re nehatin dayin.”
Rêzan Sarica: Rîsk heye ku bi her awayî kiryarên xerab lê bêne kirin
Rêzan Sarica diyar kir ku pergala cezakirinê ya giran a 25 salan bivê nevê ji aliyê fîzîkî û ruhî ve zerareke mezin dide mirovan û wiha dewam kir:
“Ji bo mirovekî girtî meseleya herî jiyanî, têkiliyên xwe yên civakî û jiyanî ye.
Ev maf li Rêber Abdullah Ocalan bi temamî hatine astengkirin an jî qedexekirin.
Halbûkî têkiliya bi cîhana derve re ji bo pêşîgirtina li kiryarên xerab û derveyî mirovahiyê, li dijî cezakirinên kiryarên li derveyî mirovahiyê xwedî rola herî girîng a parastinê ye.
Eger ev pêk nayê hingî rîsk heye ku mirov li her cûre kiryarên xerab rast bê.
Tê xwestin ku birêz Abdullah Ocalan ji aliyê fîzîkî, ruhî ve bê lawazkirin û ji aliyê fikrî ve teslîm bê girtin.
Ev cezayên lê têne birîn divê weke êrîşek li dijî polîtîka, axaftin û hunera hilberînê ya Ocalan bêne nirxandin.”
