Serokê Amerîka Biden ji dawî hatina şerê Îsraîl-Hemasê, şertê xwe eşkere kir.
Biden got, Despêkê divê Hemas hemû dîlên di destê xwe de serbest berde.
Piştî vê yekê agirbest pêkan e.
Serokê Amerîka Joe Biden doh li Waşingtonê got;
Danûstandinên agirbestê ji bo Xezeyê tenê dikarin bi serbest berdana hemû dîlên ku Hemasê di êrişa 7’ê Cotmehê de girtîn pêk were.
Biden li Koşka Spî têkildarî pirsa ka ew piştgirî dide formula “lihevkirina agirbestê ya di berdêla serbestberdana dîlan de” ev bersiv da:
“Pêşî divê dîl bên berdan, paşê em biaxivin.”
Daxuyaniya Biden demek kin piştî ku Hemas ragihand ku wan du dîlên jin ên din ên ku ji Îsraîlê revandibûn serbest berdan pêk hat.
Rûsya daxwaza rawestandina şer dike
Di dema ku DYA’yê ji bo hevdîtinên muhtemel ên agirbestê şert danîbû ku Hemas hemû dîlên di destê xwe de berde, Rûsyayê jî banga agirbestê dubare kir.
Wezîrê Karê Derve yê Rûsyayê Sergey Lavrov diyar kir ku ji bo aloziya di şerê Xezayê de bê kêmkirin divê şer raweste.
Lavrov got: “Piştî vê helbet wê pêwîstî bi mekanîzmayek hebe ku rewşa heyî di çarçoveyeke berfireh de binirxîne.
Ajansa Interfax a Rûsî ragihand ku Lavrov doh di daxuyaniya xwe ya li paytexta Îran Tehranê de bal kişand ser çareseriya du dewletî.
Di raporê de hat diyarkirin ku Lavrov Waşington sûcdar kir ku bi salan xebatên çaralî yên navbeynkariya navneteweyî ku ji Neteweyên Yekbûyî, DYA, Yekîtiya Ewropa û Rûsyayê pêk tê asteng dike.
Lavrov di civîna Tehranê de herwiha şandina keştiyên şer ên Amerîkayê li Rojhilatê Deryaya Spî rexne kir û ew wek “destwerdaneke metirsîdar di şer de” bi nav kir.
Wezîrê Karên Derve yê Rûsyayê got,
“Her ku gavên bi vî rengî bên avêtin, xetereya berfirehbûna şer wê zêdetir bibe.”
Cudahiyên nêrînên li YE’yê nehatin çareserkirin
Di dema ku DYA û Rûsya li ser şerê Xezayê helwestên cuda nîşan didin, welatên Yekîtiya Ewropayê nikarin di vê mijarê de helwesteke hevpar nîşan bidin.
Civîna wezîrên derve yên Yekîtiya Ewropayê ku duh li Luksemburgê hat lidarxistin, nekarî nakokiyên di navbera welatan de çareser bike.
