Ji roja despêkê ya êrişa Hemasê li ser Îsraîlê û heta niha, artêşa Îsraîl dibêje ew ê êrişeke bejahiyê li dijî Xeza pêk bînin.
Her çiqasî oparasyona diyarker û berfireh pêk nehatibe jî, Îsraîlê şevê din bi tankan oparasyoneke li dijî “hedefên hatine destnîşankirin” pêk anî.
Artêşê ragihand ku piştî oparasyon bi encam bûye, hêzên wan vegeriyan baragehên xwe.
Dîmenê vê oparasyonê jî hatin parvekirin.
Artêşa Îsraîlê piştî 20 rojan ji şerê bi Hemasê re, bi tankan derbasî Xezayê bû.
Artêşa Îsraîlê ragihand ku doh bi şev ji bo oparasyona “hedefên hatine destnîşankirin” bi tankan ketiye nava bakurê Şerîda Xezeyê.
Îsraîlê bi tankan ‘operasyonek diyarkirî’ pêk anî
Di daxuyaniya nivîskî ya berdevkê artêşê de hate ragihandin ku leşker piştî operasyonê ‘ji qadê çûne’.
Serokwezîrê Îsraîlê Bunyamîn Netanyahû şevê din daxuyaniyek da û diyar kir ku ji bo operasyoneke li dijî Hemasê ya li Şerîda Xezeyê amadekarî têne kirin.
Netanyahu: Ger pêwist bike ez jî wê hesab bidim
Netanyahu cara yekem e got:
Têkildarî êrişa li ser Îsraîlê pêk hatî, di nava artêş û hêzên leşkerî de wê lêpirsîn pêk were.
Eger pêwist bike ez jî wê hesab bidim.
Îsraîl ji 7’ê Cotmehê dema destpêkirina êrîşa Hemasê ve dibêje, wê operasyoneke bejahî pêk bîne.
Lê belê heta niha timî hate taloqkirin.
Bombardûmana li ser Xezeyê jî bênavber dewam dike.
Li gorî rayedaran, di êrîşa Hemasê de, bêtirî 1.400 Îsraîlî hatin kuştin.
Xeza bi temamî di bin dorpêça Îsraîlê de ye
Şerîda Xezeyê ku ji sala 2006’an ve di bin kontrola Hemasê de ye, piştî êrîşê ji aliyê Îsraîlê ve bi temamî hate dorpêçkirin.
Herêm ji av, xurek û elektrîkê bêpar hatiye hiştin.
Di bîlançoya dawî ya Hemasê ku doh parvekirî de, tê gotin,
Di encama bombardûmana Îsraîlê ya li ser herêmê de, 7 hezar û 78 kes hatin kuştin.
Îsraîlê bombe li Libnanê jî barand
Li gorî artêşa Îsraîlê, ji Libnanê mûşekek hatiye avêtin û balafirên şer jî bersiv dane vê êrîşê.
Ji 7’ê Cotmehê ve li sînorê başûr ê Libnanê di navbera Hîzbûllah a Libnanê û hêzên Îsraîlê de şer rûdidin.
Li gorî AFP’ê li aliyê Libnanê 4 sivîl, 39 çekdarên Hîzbûllahê û 9 ji rêxistinên girêdayî Hîzbûllahê bi giştî 52 kes hatin kuştin.
Hîzbûllahê doh jî ragihandibû ku du endamên wan hatine kuştin.
Rêxistina Efûyê: Gefên Îsraîl dikarin wek sûcên şer bên hesibandin
Li aliyekî din, artêşa Îsraîlê 21’ê Cotmehê li bakurê Şerîda Xezeyê belavok avêtin û ferman da ku demildest herêm were terikandin.
Rêxistina Efûyê ya Navneteweyî jî diyar kir ku ev gef dibe ku wek sûcên şer bên hesibandin.
