Endama Koordînasyona KJK’ê Besê Erzîncan têkildarî sîstema KJK’ê axivî û got: “Ne tenê ji bo azadiya jinan, em ji bo azadiya mêran û civakê jî dixebitin.
Armanca me avakirina jiyanek bi pêşengiya jinê ye.”
Endama Koordînasyona KJK’ê Besê Erzîncan tevlî bernameya ‘Xwebûn’ê ya Jin TV bû û li ser pergala Komalên Jinên Kurdistanê-KJK’ê axifî.
Besê Erzîncan destpêkê bal kişand ser rabirdûya sîstema KJK’ê û got:
“Di mamezrandina PKK’ê de jin jî cihê xwe girtin.
Sîstema me yekemcar bi hevala Sakîne Cansiz destpê kir.
Ji ber ku hevala Sakîne yek ji damezrandinên PKK’ê ye.
Rojhilata Navîn gelek caran partî ava bûn, lê belê ti carî jin nebûn ji damezrînerên wan.
Dema ku KJK ava bû, têkoşînek hebû ku 40 salan dewam dikir.
Besê Erzîncan: Her asteke rêxistiniyê gaveke mezin bû
Besê Erzîncan wiha berdewamî da nirxandinê xwe:
“Di sala 1993’an de artêşa jinê ava bû, di sala 1995’an de Yekîtiya Azadiyê ya Jinên Kurdistanê (YAJK) ava bû.
1999’an de jî partîbûna jinê pêk hat.
Sala 2014’an Komalên Jinên Kurdistanê-KJK’ê hate ragihandin.
Di her qonaxê de karên jinê hîn bêhtir mezin bû, kûr bû û berfireh bû.”
Bese Erzîncan: Em dixwazin jiyanek nu ji bo jin mêr û civakê ava bikin
Besê Erzîncan ragihand ku sîstema KJK’ê ji gelek aliyan ve dixebite û wiha dewam kir:
“Rêbertî her tim xwest ku jin bibin xwedî îradeyeke serbixwe.
Di sîstema heyî de jin weke ‘ya mêr, ya dewletê, ya sîstemê’ tê dîtin.
Me got em vê şaşitiyê nekin. Rêber Apo şoreş hemû nirxand.
Ji aliyê jinan ve gelek kêmasî dît. Got, em şoreşeke rasteqîn bikin.
Me xwe ji sîstema modernîteya kapîtalîst qut kir.
Em dixwazin jiyaneke nû ji bo jinê, mêr û civakê ava bikin.”
Besê Erzîncan ragihand ku sîstema KJK’ê mîna sîwanekê ye û got: “Sîstemeke navendî nîne. Di nava sîstema KJK’ê de PAJK heye, rêxistinên ciwanan hene, YJA Star heye.
Her sazî di nava vê sîstemê de xwe bi rêxistin dike.
Bêguman PAJK di vir de cuda ye. PAJK pêşengiyê ji tevahiya sîstemê re dike.
Kadro pêşengiyê jê re dike lê belê hiyerarşî di nav de nîne.
Her kesên ku daxwaza azadî, wekhevî, edalet, sosyalîzm, azadiya jinê dikin û dixwazin bixebitin dikarin tevlî rêxistinê bibin.
Paradîgmaya me diyar e, paradîgmaya demokratîk, ekolojîk û azadîparêziya jinê ye.”
Besê Erzîncan: Sîstema KJK’ê ji bo tevahiya Rojhilata Navîne
Endama Koordînasyona KJK’ê Besê Erzîncan herî dawî ev nirxandin kir: “Ev sîstem ji bo tevahiya Rojhilata Navîn û cîhanê ye.
Dibe ku li Kurdistanê destpê kiribe lê belê armanca me ew e ku sîstemeke konfederal ava bikin ku li tevahiya cîhanê pêşengiyê ji jin û civakê re bike.
Eger em li Rojhilata Navîn û cîhanê sîstemeke konfederal a jinê ya xwe dispêre demokrasî, azadî û ekolojiyê ava bikin, hingî dikarin modernîteya demokratîk ava bikin.”
