Li Iraqê ji bo hilbijartina encûmenên parêzgehan dengê despêkê ket sindoqê.
Di dengdana dengên taybet de rêjeya tevlîbûnê ji sedî 38 derbas kir.
Bi rêjeya ji sedî 53 jî Silêmaniyê bû bajarê herî zêde dengên taybet lê hatîn bikaranîn.
Li Iraqê hilbijartina taybet ya ji bo encûmenên parêzgehan destpê kir.
Saet 7’ê sibê hêzên leşkerî, wezareta navxwe û koçber ji bo dengdan taybet berê xwe dan li ser sindoqan.
Bi giştî mafê milyonek û 2 hezar û 393 kesan heye ku divê hilbijartina taybet de dengên xwe bikarbînin.
Di dema destpêkirina dengdanê de li Taxa Sedr ya Bexdayê bi narincokeke dengî êrîşî ser navendeke dengdanê hate kirin.
Têkildarî êrişê Berdevkê Wezareta Navxwe ya Iraqê diyar kir ku ti ziyanek çênebûye û got:
“Pirsgirêkeke mezin nîn e, em ê lêkolînê li ser bûyerê bikin.”
Piştî 18 salan li Kerkûkê hilbijartinên ji bo encumenên parezgehan hat lidarxistin
Li Kerkûkê jî hilbijartina ji bo parêzgehan ku wê qedera nasnameya bajêr diyarbike piştî 18 salan hat lidarxistin.
Ji ber berî niha bi hincetên rewşa taybet ku di navber hikûmeta Iraq û Herêma Başûrê Kurdistanê de nakokî li ser wan deveran heye, hilbijartin nedihate kirin.
Li gorî zanyariyên Ofîsa Kerkûkê ya Komîsyona Serbixwe ya Hilbijartinên Iraqê li bajêr mafê dengdanê yê mîlyonek û 153 hezar kesî heye.
Ji van 57 hezar jî dengdarên taybet in.
Ji bo van dengderan 161 cihên dengdanê hatibûn diyarkirin.
Ji bo bidestxistina 15 kursiyên encûmenên parêzgeha Kerkûkê, 11 lîste û hevpeyman hene.
Li bajar 11 lîste ji bo 15 kursiyên encûmenên parêzgeha bajar ketine pêşbaziyê.
Nebeşdarbûna Kurdan a bi lîsteyekê rê li ber parçebûna dengan vedike.
Li Şengalê jî hêzên leşkerî û polîs berê xwe dan ser sindoqan
Her wiha li Şengalê jî di çarçoveya hilbijartinan de du navendên dengdana taybet hatin danîn.
Di saetên sibehê de hêzên leşkerî û polîs berê xwe dane ser sindoqan.
Hevserokê Meclisa Gel a Guhbel Emer Paso bang li Êzidiyên di nava polîsên federal û artêşê de kir deng xwe bidin xwe û namzetê xwe.
Mafê 54 hezar koçberên Êzidî yên li kampên Herêma Başûr de hene ku deng bi karbînin.
Di vê çarçoveyê de, li 17 kampan proseya dengdanê pêk hat.
Lê ji ber zextên PDK’ê yên li ser çapemeniya azad, rê nehat dayîn ev hilbijartin were şopandin.
Ji ber wê yekê nehat zanîn hilbijartin çawa birêve çû.
Komisyona Hilbijartinê: Rêjeya tevlîbê ji sedî 38 derbas kir
Di saetên êvarî de, Komisyona Bilind ya Hilbijartinên Iraqê rêjeya tevlîbûna dengdana taybet ya li seranserê Iraqê bi daxuyaniyekê eşkere kir.
Li gorî komisyonê rêjeya dengdanê ji sedî 38 derbaskiriye.
Ji sedî 53 rêjeya herî zêde jî li Silêmaniyê bû.
