Çalakvanên mafê mirovan û parêzerên Bakur û Rojhilatê Sûriyê diyar kirin ku dewleta Tirk bi êrîşên xwe yên dagirker hevpeymanên navnetewî bin pê dike.
Hiqûqnasan pîvanên hevpeymana Neteweyên Yekbûyî destnîşan kirin û bang li NY kirin ku li gorî hevpeymana xwe tevbigere û nebe hevkarê sûcên şer yên dewleta Tirk.
Ji ber Sekretêrê Giştî yê NY’yê Antonio Guterres piştî hevdîtina xwe ya bi Erdogan re ku di 1’ê Cotmehê de kiribû, plana paqijiya etnîkî ya dewleta Tirk erê kiribû, hiqûqnasên li Bakûr û Rojhilatê Sûriyê nerazîbûn nîşan dan.
Çalakvanên mafê mirovan û parêzeran der barê mijarê de li bajarê Qamişlo, li pêşiya Navenda Komseriya NY’yê ya Karûbarên Koçberan daxuyaniyeke çapameniyê dan.
Koçberên ji Serêkaniyê û Girê Spî jî tevlî daxuyaniyê bûn.
Daxuyanî ji aliyê parêzerê ji Serêkaniyê Şahîn Lalê ve hate xwendin û hat diyarkirin ku ji bo parastina azadî, demokrasî û mafê mirovan baweriya wan bi pîvanên NY heye û xwestin NY li dijî dagirkeriya dewleta Tirk li gorî van pîvanên xwe tevbigere.
Di daxuyaniyê de sûcên şer yên dewleta Tirk ên weke paqijiya etnîkî, guhertina demografiyê, komkujiya li dijî sivîlan destnîşan kirin û ji NY xwestin ku nebe hevkarê van sûcên dewleta Tirk.
Hiqûqnasan daxwazên xwe yên ji NY weha rêz kirin:
Li gorî xala 7’an ya hevpeymana NY, li hemberî xetere yan jî êrîşeke li dijî aştiyê ji bo parastina aştî û ewlekariya navnetewî, divê Konseya Ewlekariyê tebbîran bigire û dagirkeriya dewleta Tirk rawestîne.
Li gorî xala 5’an a hevpeymana NY, ji ber dewleta Tirkiye bi êrîşên dagirker yên li dijî Bakûr û Rojhilatê Sûriyê li dijî aştî, ewlekarî û berjewendiyên civaka navnetewî tevdigere divê endamtiya Tirkiye ya NY were rawestindin.
Li gorî xala 6’an a hevpeymana NY, ji bo çareserkirina pirsgirêkan di dewsa şer de divê rêbazên diyalog û aştiyanê esas were girtin. Li gorî vê yekê NY ji bo aloziya li Sûriyê bi rêyên aştiyana were çareserkirin divê berpisyariyên xwe bi cîh bîne.
Her weha çalakvanên mafê mirovan û parêzerên Bakur û Rojhilatê Sûriyê di daxuyaniyê de diyar kirin ku ji bo vegera welatiyên Sûriyê yên li Tirkiye, di bin navê “herêma ewle” de bahaneya dewleta Tirk a dagirkirina axên Sûriyê qebûl nakin.
Hiqûqnasan bang li NY kirin ku vegera welatiyên Sûriyê yên li Tirkiye di bin kontrola NY de pêk were û di vê mijarê de rol bilîze.
