Şerê Xezayê bi giranî didome û Îsraîl amadekariyên operasyona li dijî herêma Refahê dike û li dijî vê herêmê êrişên ezmanî pêk tîn.
Li paytexta Misirê Qahîreyê jî bi beşdariya Amerîka, Misir, Îsraîl û Qatarê li ser rewşa Xezayê civîn tê lidarxistin.
Êrişên Îsraîlê yên li dijî Xezayê dewam dikin û li navenda bajar şerekî giran diqewime.
Di roja 132’an de jî hejmara kuştî û birîndaran zêde dibe.
Ji 7’ê Cotmeha 2023’an ve hejmara kesên li Xezayê hatine kuştin 28 hezar derbas kiriye.
Li aliyê din jî Îsraîl ji aliyekî amadekariyên operasyoneke bejahî ya li dijî herêma Refahê didomîne û ji aliyê din jî êrişên ezmanî pêk tîne.
Li Qahîreyê civîna Amerîka, Misir, Îsraîl û Qatarê pêk tê
Ji bo pêkanîna agirbestê û serbest berdana dîl girtiyan jî hevdîtin dewam dikin.
Duh li paytexta Misirê Qahîreyê bi beşdariya Amerîka, Misir, Îsraîl û Qatarê civînek li ser rewşa Xezayê hate lidarxistin.
Di civînê de Rêveberê CIA William J. Burns, Serokê MOSSAD’ê David Barnea, Şêxê Qatarê El Sanî û Serokê Îstixbarata Misirê Ebbas Kamil amade bûn.
Li gorî dezgehên ragihandinê yên Misirê di civînê de li ser peymana bi hev guhertina dîl girtiyan û pêkanîna agirbestê niqaş hatin kirin.
Li gorî nûçeya New York Times’ê di hevdînên Misirê de ku encam nehate bidestxistin, 3 roj hatin dirêjkirin.
Artêşa Îsraîlê: Ji bo bi dawîbûna şerê Xezayê hê demeke dirêj maye
Fermandarê Giştî yê Artêşa Îsraîlê Herzî Halevî têkildarî şerê li Xezayê roja sêşemê civîneke çapemeniyê lidarxist.
Halevî diyar kir ji bo dawîkirina şerê li Xezayê hê demeke dirêj maye û wiha got,
“Em encamên girîng ên eskerî bidest dixin. Lê ji bo em bighêjin hedefên xwe yên şer li pêşiya me rêyeke dirêj heye.”
Tê diyar kirin ev hedefên Îsraîlê jî kuştina rêveberê Hemasê yê li Xezayê Yehya Sinwar û gelek rêveberên din yên komên Filistînî ne.
NY: Em ê nebin xwedî rol ku mirov bi darê zorê ji cihên xwe bên derxistin
Li aliyê din Neteweyên Yekbûyî têkildarî rewşa şer ya li Xezayê û êrişên Îsraîlê yên li ser herêma Refahê hişyarî kir.
Berdevkê Sekreterê Giştî yê NY Stephane Dujarric diyar kir Neteweyên Yekbuyî wê nebe xwedî rol ku mirov bi darê zorê ji cih û warên xwe bên derxistin.
Rêveberê alîkariyên lezgîn yê NY Martin Griffiths jî diyar kir Filistiniyên li Xezayê mexdûrên êrişeke ku mînakê wê nîne û got,
“Encamên dagirkirina Refahê wê giran be.”
