Koordînasyona KJK’ê û Tevgera Jinên Kurd a li Ewropayê (TJK-E) bi daxuyniyên cuda nerazîbûn nîşanî Komîteya Pêşîgirtina li Êşkenceyê (CPT) da ji ber ku serdana Tirkiyê kir lê belê neçû Îmraliyê. di daxuyanê de hat gotin CPT bi bêdengiya xwe ya li hemberî kiryarên li dijî mirovahiyê yên li Îmraliyê dibe hevkar ji vî sûcî.
Koordînasyona KJK’ê bi daxuyniyekê nerazîbûn nîşanî Komîteya Pêşîgirtina li Êşkenceyê (CPT) da ji ber ku serdana Tirkiyê kir lê belê neçû Îmraliyê.
KJK’ê di daxuyaniya xwe de destnîşan kir ku ew helwesta CPT qebûl nakin û got:
Saziyên hêzên modernîteya kapîtalîst hemû veguherîne amûreke şerê desthilatdariyê.
Şandeya CPT ku beriya çend rojan hat Tirkiyê, li gel bang û berxwedana gelê Kurd û dostên wan jî sîstema tecrîdê ya girankirî ji nedîtî ve hat û neçû serdana Îmraliyê.
Vê helwestê nîşan da ku CPT bi hesabên desthiladariya qirêj ên dewletan ji cewher û armanca xwe dûr ketiye.
Weke KJK’ê em vê helwesta CPT a ne exlaqî qebûl nakin.
Em bang li saziyên navneteweyî hemûyan dikin ên ku bi navê nirxên exlaqî yên mirovî tevdigerin, ku bi rola xwe ya esasî rabin.
KJK’ê balkişand ser grevên birçîbûnê yên li girtîgehan û wiha domand:
Berxwedana li zindanan karakterê pêvajoyê jî diyar kiriye.
Bi vê wesîleyê em hevrêyên ku 84 roj in di greva birçîbûnê de ne silav dikin.
Em bang li gelên xwe, dostên xwe û jinan dikin ku li dora vê berxwedanê têkoşînê mezin bikin.
TJK-E: Di 27′ ê Sibatê de berê xwe bidin Strasboûrgê
Her wiha Tevgera Jinên Kurd a li Ewropayê (TJK-E) jî bi daxuyaniyekê bang li jinan kir ku di 27’ê Sibatê de beşdarî çalakiya li Strasboûrgê bibin ku wê ji bo azadiya Rêber Apo bê lidarxistin.
Di daxuyaniyê de işaret bi serdanên CPT ji bo girtîgehên Tirkiyê ji bilî girtîgeha Îmraliyê kir û hate gotin:
“CPT’ê bi bêdengiya xwe hevkarê vî sûcî ye”
‘Ev nêzîkatiya CPT ne li qedexekirina êşkenceyê ne jî li wezîfeyên xwe yên pêşîgirtina li êşkenceyê tê.
CPT bi bêdengiya xwe ya li hemberî kiryarên li dijî mirovahiyê yên li Îmraliyê dibe hevkar ji vî sûcî.
Em bang li CPT dikin ku tespît û çavdêriyên xwe yên li Îmraliyê bi raya giştî re parve bike û wezîfeya xwe bi cih bîne.
Li ser vê bingehê em jin, di 27’ê Sibatê de em ê careke din li Strasboûrgê çalakiyê bikin.
Ji bo têkbirina komploya herî berfireh a dîrokê û misogerkirina azadiya fîzîkî ya Rêber Apo em ê têkoşîna xwe hîn mezin bikin.”
