Li aliyekî şer û li aliyê din niqaşên li ser agirbestê.
Di roja 164’an ya şerê li Xezayê de 81 kesên din hatin kuştin.
Serokê rêveberiya Filistînê Mehmûd Ebas bang li hêzên cîhanê kir ku pêşî li operasyona Îsraîlê ya li dijî Refahê bigirin.
Serokwezîrê Îsraîlê Netanyahû jî eşkere kir ku daxwazên ecêb yên Hemasê zorê li peymana agirbestê dike.
Li Xezayê li aliyekî şer giran e, li aliyê din jî hevdîtinên ji bo agirbestê dewam dikin.
Di roja 164’an de li Xezayê şer û êrişên giran pêk hatin.
Hat ragihandin hêzên Îsraîlê careke din êriş birin ser nexweşxaneya El Şifa ya li bajêr.
Hat diyar kirin di encama êrişên ku balafirên şer yên bê mirov jî hatin bikaranîn de gelek kes mirin û birîndar bûn.
Artêşa Îsraîlê jî derbarê mijarê de daxuyanî da û eşkere kir ku wan li dijî nexweşxaneya El Şifa operasyon destpêkirine.
Di daxuyaniyê de hat diyar kirin, wan agahî girtiye ku rêveberên Hemasê nexweşxaneyê bikartînin ji lewra jî wan bi ser nexweşxaneyê de girtiye.
Di şerê li Xezayê de 81 kesên din hatin kuştin
Wezareta Tenduristiyê ya Hemasê jî bi daxuyaniyekê bîlançoya şer ya 24 seetên dawiyê eşkere kir.
Wezaratê ragihand di êrişên hêzên Îsraîlê de, 81 kesên din hatin kuştin 116 jî birîndar bûn.
Li gorî daxuyaniyê hejmara kesên ji 7’ê Cotmeha 2023’an ve li Xezayê mirin derket 31 hezar 726 kesan ya birîndaran jî bû 73 hezar 792.
Sholz: Ji bo şerê li Xezayê pêdivî bi çareseriyeke mayînde heye
Li aliyê din hevdîtinên li ser pêkanîna agirbestê ya ji bo Xezayê jî didomin.
Serokwezîrê Almanyayê Olaf Sholz duh serdana Îsraîlê kir û li Qudsê bi Serokwezîrê Îsraîlê Binyamîn Netanyahû re hevdîtin pêk anîn.
Serokwezîrê Alman piştî hevdîtinê di civîna çapemeniyê de axivî.
Sholz ji ber hejmara zêde ya mirina sivîlan a di şerê li Xezayê de ji Netanyahû xwest careke din bifikire û wiha got,
“Mafê Îsraîlê heye ku li dijî rêxistina îslamî a terorê Hemasê xwe biparêze. Divê Netanhayû jî li ser stratejiya xwe ya li Xezayê careke din bifikire.
Teror tenê bi rêyên leşkerî tune nabe. Ji bo bi dawîbûna şer pêdiviya me bi çareseriyeke mayînde heye.”
Netanyahû: Heta ku Hemas li Xezayê be aştî nabe
Serokwezîrê Îsraîlê Netanyahû jî eşkere kir ku di mijara tunekirina Hemasê de bi Serokwezîrê Alman re li hevkirine û got,
“Heta ku Hemas li Xezayê hebe aştî nabe. Heta ku Hemas li dijî me di nava hewldanên qirkirinê de be wê pêşereoja me nebe.”
Netanyahû: Daxwazên ecêb ên Hemasê zorê li peymana agirbestê dike
Li aliyê din Serokwezîrê Îsraîlê derbarê peymana agirbestê de ji Televizyona CNN re axivî.
Netanyahû diyar kir daxwazên ecêb yên Hemasê zorê li peymanê dikin û wiha got,
“Wê bi demê re ev yek bê dîtin. Çendî daxwazên Hemasê hê zêde zorê li peymanê dikin jî lê emê bidomînin, ji ber em wan dîl girtiyan dixwazin.”
Wezîrê Karên Derve yê Brezilyayê serdana Filistînê kir
Wezîrê Karên Derve yê Brezilyayê Mauro Vieira jî serdana Filistînê kir û bi Serokê Rêveberiya Filistînê Mehmûd Ebas re hevdîtin pêk anîn.
Hevdîtina Vieira û Ebas li bajarê Ramallah yê Şerîa Rojava pêk hat.
Mehmûd Ebas di hevdîtinê de bal kişand li ser êrişa li dijî Refahê ku Îsraîl amadekariya wê dike û wiha got,
“Ji bo me mijara girîng û lezgîn ew e ku divê pêşî li vê êrişê bê girtin.
Dagirkirina Refahê ku 1,5 Filistîniyan xwe lê girtine, wê rê li ber felaketeke mirovî veke.
Ji bo astengkirina vê êrişê divê di asta navnetewî de hewldanên zêde bên kirin.”
Di hevdîtinê de Wezîrê Brezilyayî jî diyar kir ew piştgiriyê didin mafê gelê Filistînê û îşaret bi girîngiya çareseriya du dewletî kir.
