Li Bakur û Rojhilatê Sûriyê keysbazên bazarê bi zêdekirina bûhayan a li derveyî pîvanan welatiyan bêzar dikin.
Rêveberiyên şopandina bazaran di nava liv û tevgerê ne de, lê dîsa jî pirsgirêk derdikevin.
Herêma Bakur û Rojhilatê Suriyê, ji bilî êrîşên komên çeteyan û dewleta Tirk a dagirker, bi salane dijî dorpêçan jî têdikoşe.
Rêveberiya Xweser hewl dide bi berhemên herêmî pêdiviyên jiyanî yên welatiyan peyda bike.
Yên ku li herêmê peyda nabin jî, bi derfetên sînordar di çend deriyên sînor ên vekirî de tên anîn.
Keysbazên bazaran û bazirgan jî dixwazin ji vê yekê feyde bigirin, welatiyan bişelînin, qezencek neheq bidest bixin.
Rêveberiyên şopandina bazaran kontrolên xwe zêde dikin û hewl didin ku pergalek bê rûniştandin, lê keysbaz jî ranawestin.
Welatî: Ferq gelekî zêde ye
Şêniyê bi navê Heysem Seîd Xelîl ê ji Dêrikê diyar kir ku ew ji ber bihabûna kel û pelan zehmetiyan dikişînin û got:
“Hin caran ferqa buhayê di navbera dikanan de digihêje 5 hezar lîreyî.”
Dikandar: Bazirgan buhayan diyar dikin
Beşîr Silêman jî ku li sûka navçeya Tirbespiyê dikana wî heye bal kişand ku bûhayê tiştan ji aliyê bazirganên ku madeyan ji derve tînin ve tê diyarkirin.
Gerînendetiya Gemhêr: Em ji bo pergalê xebata xwe zêde dikin
Rayedarên Gerînendetiya Zemhêr a Kantona Cizîrê jî diyar kir ku komîteyên wan çavdêriyên bazarê zêdetir kirine.
Komîteya Çavdêriya Eyn Îsa: Em dişopînin
Endamê Komîteya Çavdêriya Zemhêr a navçeya Eyn Îsayê Ehmed Îsmaîl jî destnîşan kir ku çavdêriya wan a li ser firin, stasyon, xwaringeh, dikanan didome û hewl didin pêşiya keysbazî bigirin.
Buhayê goştê mirîşkan hat diyarkirin
Keysbazên ku dixwazin li gorî keyfa xwe şekil bidin bazarê, kiloya goştê mirîşkan derxistibû 55 hezar lîreyê Suriyê.
Lewre Nivîsgeha Parastina Serfkaran 26’ê Adara 2024’an buhaya kiloya mirşîkan diyar kir.
Welatî: Barê me giran e
Hesen Mihemed ê ji bajarê Reqayê jî anî ziman ku keysbazan kîloya mirîşkan beriya diyarkirina bûhayê wan, bi 2 qat zêdetir difirotin.
Xaldiye El Dêv a ji gundewarê Reqayê jî got:
“Her tişt biha ye, ev barê me giran dike.”
Welatiyan bang li rayedaran kirin kontrolan zêdetir bikin.
Rêveberiya şopandinê ya Reqayê: Wê qanûn were pêkanîn
Endamê Rêveberiya Parastina Serfkaran û Şopandina Bazarê ya Kantona Reqayê Mihemed Ebdulhemîd diyar kir ku ew hewl didin rojane sûkên bajar û gundewaran kontrol bikin.
